GROVE> A Festa do Marisco do Grove encara a súa recta final. A carpa instalada no Corgo botará o peche este vindeiro domingo, logo de dúas intensas semanas. Por alí seguen desfilando estes días milleiros de persoas, na procura dos mellores manxares do noso mar.
Xente e máis xente dáse cita estes días na Festa do Marisco do Grove. A afluencia de visitantes é constante nas fins de semana pero tamén en xornadas laborables como hoxe, no medio da semana. A LXII edición deste evento encara a súa recta final cunha moi boa resposta por parte do público que, de novo, acude a esta cita na procura dos mellores produtos do mar.
Durante estes días o municipio convértese nun dos grandes referentes do turismo en Galicia grazas á gastronomía. Ata aquí chegaron estes días visitantes de todo o mundo.
Ademais de turistas internacionais, como sempre, a Festa recibe multitude de visitantes chegados de tódolos recunchos de España.
E mesmo atopamos mecos que volven a casa pola Festa do Marisco.
O polbo, a zamburiña e a navalla seguen gañando adeptos, ao igual que o arroz de mariscos que está rexistrando boas cifras situándose como o cuarto prato máis demandado. Nas mesas tamén atopamos pratos de mexillón, empanada, ameixas ou berberechos.
Ademais da calidade do produto, o público destaca a boa organización do evento.
A festa complétase con distintas propostas musicais ao longo de toda a programación. A edición deste ano rematará este vindeiro domingo.
