BOIRO> Arranca unha nova edición do Programa Integrado de Emprego do Barbanza. Os concellos de Boiro, Rianxo e A Pobra volven colaborar na terceira edición deste plan que facilitará o acceso ó mercado laboral a un cento de persoas desempregadas.
Por terceiro ano consecutivo, os concellos de Boiro, Rianxo e A Pobra volven colaborar na posta en marcha do Plan Integrado de Emprego para o curso 2025/2026. Trátase dun programa formativo e de capacitación laboral no que se impartirán contidos especializados en distintas áreas, tendo en conta a demanda das empresas da zona e o perfil dos alumnos.
Esta semana comezará o proceso de captación do alumnado coas inscricións e entrevistas. Ademais do Centro de Formación de Espiñeira, sede do programa, os técnicos desprazarase ata os concellos da Pobra e Rianxo.
Destaca este ano ademais a aposta pola renovación de contidos con nova oferta formativa como os cursos de firma dixital, creación de páxinas web ou manexo de drons.
O programa conta co financiamento da Consellería de Emprego que achegou unha axuda de 220 mil euros para o desenvolvemento do curso, cunha duración de 12 meses. Nas pasadas edicións, a taxa de inserción superou o 60 por cento.
