RIBEIRA> Ribeira quenta motores para a celebración do entroido que repartirá 8500 en premios tanto nos concursos de disfraces como no festival de murgas. No apartado musical, o prato forte será a actuación de King África que compartirá cartel con Diego Moreira e Mario Álvarez.
Entre o 13 e o 18 de febreiro, Ribeira vivirá un entroido cheo de cor con actividades para tódolos públicos. A animación musical de rúa abrirá o programa o venres mentres que o sábado os nenos serán os principais protagonistas coa actuación de Paco Nogueiras no Auditorio Municipal e a a festa infantil das amas de casa no Liceo. O domingo, a carpa de entroido do malecón acollerá a Choqueirada Infantil cun concurso de disfraces que repartirá 500 euros en vales de compra. O luns terá lugar a gran festa nocturna coa actuación estelar de King África.
O martes, festivo local, desenvolverase o tradicional festival de murgas e comparsas que repartirá 6000 euros e premios.
Os festexos chegarán á súa fin o mércores de cinza co enterro do Felipe a partir das sete e media da tarde na Praza dos Mariñeiros. Durante todo o entroido desenvolverase ademais un concurso de disfraces nos distintos establecementos hostaleiros da vila. Os interesados en participar no certame, que repartirá preto de 2000 euros, poden consultar as bases na web municipal ribeira.gal.
