CAMBADOS> Arranca a décimo cuarta edición do Programa Integrado de Emprego que impulsa a Mancomunidade do Salnés. Un cento de alumnos formaranse durante os vindeiros meses en distintos campos co obxectivo de acadar un posto de traballo. O itinerario formativo mantén os cursos tradicionais reinventándose con novos enfoques tecnolóxicos. O programa conta cun investimento de 250.000 euros, dos que a xunta aporta 220.000.
É unha das grandes referencias da Mancomunidade do Salnés. Falamos do seu Programa Integrado de Emprego, que estrea a súa décimo cuarta edición. Un cento de alumnos formaranse durante os próximos meses co obxectivo de acadar a súa inserción no mercado laboral.
O programa ofrece un abano de máis de trinta accións, dende as máis clásicas ata as que poñen o foco nos avances tecnolóxicos, como o de ciberseguridade, robótica colaborativa, drons con IA, ortofotografía e realidade virtual.
A Xunta, a través da Consellería de Emprego, achega a este programa de emprego 220.000 euros, mentres que a Mancomunidade aporta uns 37.000.
Para o éxito deste programa tamén é fundamental a implicación do tecido empresarial da comarca. Primeiro facilitando o desenvolvemento práctico do proxecto e despois culminando o proceso coa contratación deste novo persoal cualificado.
