RIBEIRA> Acompañado da alcaldesa, María Sampedro, e o director xeral de Comercio e Consumo, Gabriel Alén,entre outras autoridades, o conselleiro de Emprego, Comercio e Emigración, José González, visitou ha praza de abastos da localidade unha vez concedido o selo de Mercado Excelente.
Ribeira súmase así a outras catro localidades que xa contan con esta distinción como é o caso de Vilagarcía de Arousa, Tomiño, Pontedeume e Carballo.
Todas estas prazas de abastos destacan pola súa modernidade, innovación e dinamización, sen perder a autenticidade, a tradición e o trato personalizado, o que lles permite proporcionar ás persoas consumidoras unha ampla variedade de produtos frescos de proximidade e óptima calidade.
A de Ribeira suma ademais un bo emprazamento, en pleno centro da cidade.
A alcaldesa, María Sampedro, destacou a importancia deste logro que pon en valor este espazo, centro neurálxico do comercio local.
Durante a visita o titular de Comercio tivo tempo de comprobar a calidade do produto que se vende nos máis de 20 postos de venda cos que conta este mercado, aproveitando ademais para realizar a súa propia compra, de onde se levou rape e chopo da Ría.
A Xunta ten coma obxectivo acadar os 25 Mercados Excelentes no período de execución do Plan Estratéxico do Comercio de Galicia 2025-2030.
