VILANOVA> Se está pensando en emprender, saiba que no Polo de Emprendemento de Vilanova pode atopar un gran aliado. O vindeiro mes de novembro cumpriranse dous anos dende que o servizo, localizado no Pazo de Vista Real, abriu as súas portas. Neste tempo, axudaron a que 401 proxectos colleran forma, con titorías e asesoramento personalizados.
O vindeiro mes de novembro cumpriranse dous anos dende que o Polo de Emprendemento de Vilanova abriu as súas portas. Un tempo no que se ten confirmado como un servizo de éxito.
Polas instalacións no Pazo de Vista Real pasaron neste tempo 401 proxectos. Todos contan co acompañamento personalizado dos profesionais do polo. Na actualidade, 364 seguen activos e tan só cinco foron abandonados.
Tamén son variadas as ideas. Por sectores, predominan as actividades administrativas e servizos auxiliares. Séguenlle os servizos e as actividades artísticas, recreativas e de entretemento. Na maior parte dos casos, estes proxectos teñen detrás a emprendedores de entre 35 e 50 anos.
Rocío é unha destas emprendedoras. É de Santo André de Xeve, en Pontevedra, e hai poucos meses que chegou ao Polo de Emprendemento de Vilanova co seu proxecto baixo o brazo: Xiro Tradicional.
A información que lle ofreceron e, sobre todo, o acompañamento para desenvolver o seu proxecto foron fundamentais para que Xiro Tradicional collera forma.
Tamén é unha realidade Saraiba, o primeiro aceite de oliva virxe da comarca do Salnés. É froito dun proxecto de Victoria, de Dena, no concello de Meaño.
No seu caso, chegou ao Polo de Emprendemento de Vilanova con outra idea na cabeza. Pero o nacemento de Saraiba levouna a concentrar neste proxecto todas as súas forzas.
Xiro Tradicional e Saraiba son só dous exemplos. Nestes dous anos de vida, o polo vilanovés realizou máis de 1.100 titorías, 83 reunións con entidades do territorio ou 27 eventos. Cifras que deixan claro o dinamismo desta oficina, unha das 15 que forman a rede despregada en todo o territorio galego.
