LOUSAME> O concello de Lousame abre o prazo de inscricións para participar no programa de Leisure Activities que dará comezo o 17 de agosto. Será impartida polas voluntarias que acaban de incorporarse no marco do programa de Voluntariado Europeo do que Lousame forma parte dende 2017.
Os interesados en participar no programa de actividades de ocio en inglés que imparte o concello de Lousame xa poden reservar a súa praza de xeito gratuíto a través da web bandoticket.es. O programa, dixirido a nenos de 6 a 12 anos, impartirase entre o 17 e o 21 de agosto no local social do Sanguiñal.
As encargadas de programar e impartir estas actividades serán as dúas novas voluntarias do programa europeo: a francesa Alice Guyot e a alemá Coco Golte.
Lousame participa dende o ano 2017 neste programa, recibindo voluntarios de diversos países de Europa, que realizan prácticas nos distintos servizos municipais durante a súa estadía. Xunto co de Ribadavia, Lousame é o único concello galego, adherido a este programa.
