RIBEIRA> BNG, PSOE e o grupo de Non Adscritos, que actualmente conforman a oposición, forzan a convocatoria dun pleno extraordinario para pedirlle explicacións ó actual goberno municipal polo proxecto de construción da futura residencia pública.
Segundo denuncian a intención do actual goberno municipal formado por Partido Popular e PBBI é tirar por terra o proxecto xa iniciado en anteriores mandatos e que estaba previsto para As Saíñas, no que xa se levaban investidos máis de 800 mil euros de cartos públicos.
Para eles a idea do executivo local de trasladar a residencia a zona de Cruxeiras, no parque de San Roque suporá un novo retraso na construción da dita infraestrutura, ademais de considerar que non é o lugar máis apropiado para ela, ó emprazarse nun lugar illado e pouco accesible.
O goberno municipal terá agora de prazo quince días hábiles a partir de hoxe para convocar a sesión plenaria extraordinaria solicitada pola oposición.
