Os mexilloeiros da ría de Muros volveron ó traballo tras catro meses parados pola marea vermella. A reapertura do polígono máis grande da ría, durante a pasada semana, traduciuse nunha frenética actividade no porto muradán no que se descarga unha media diaria de trescentas toneladas.
Os produtores afánanse estes días en retirar a colleita de mexillón que, durante catro meses, permaneceu suxeita nas cordas das bateas á espera de que a marea vermella remitise. Fízoo finalmente a pasada semana, cando reabría o último dos polígonos pechados, o Muros B. dende entón, os mexilloeiros están a extraer unha media de trescentas toneladas diarias, principalmente para conserveiras pero tamén para venda en fresco. O longo episodio de toxina que este ano afectou á ría provocou que non puideran aproveitar a campaña de Nadal.
Aínda así, os profesionais teñen boas expectativas de cara á vindeira campaña. De aí, que estean a axilizar a retirada do mexillón de tamaño comercial das bateas para dispoñer de máis espazo para a cría. Durante os meses de paro realizouse o desdobre das cordas pero ó non poder retirar o bivalvo, a futura produción quedaba limitada. Agora, tan só hai que agardar que a toxina non volva facer acto de presenza por un longo periodo.
