VILANOVA> Os rapaces do Colexio de Baión, en Vilanova, aprenderon hoxe normas de seguridade viaria. Os nenos e nenas participaron nun circuíto cheo de “stops”, pasos de peóns e curvas. Sen dúbida, un xeito moi divertido de aprender algo tan fundamental como é saber moverse pola estrada, xa sexa en coche ou en bicicleta.
Eles forman parte da xeración ‘Cero-cero’, cero accidentes, cero vítimas. Coa vista posta nese obxectivo, esta mañá puxeron en práctica tódolos seus coñecementos de seguridade viaria. A través dun completo circuíto de rúas, con rotondas, sinais e pasos de peóns, os máis cativos aprenden que na estrada todos estamos conectados… e o máis importante: a necesidade dun respecto mutuo entre peóns e condutores. A xornada resultou proveitosa para todos estes rapaces, aínda que para algún o día resultou un tanto accidentado.
A Policía Local de Vilanova encargouse de explicar ós rapaces as leccións básicas de circulación. Así que xa o saben: a xeración Cero-Cero xa está en marcha. Para formar parte dela é moi sinxelo. Só hai que ter sentidiño ó volante e respectarse na estrada.
