BARBANZA

A Consellería do Mar vén de outorgar a concesión para a nova nave de redes de Ribeira que se emprazará na lonxa vella. Portos de Galicia investiu 40 mil euros no acondicionamento das instalacións que darán cabida tamén a unha aula formativa.

A Plataforma pola Sanidade Pública retomou as mobilizacións diante do centro de saúde de Ribeira despois do parón das festas de Nadal. Aínda que a situación mellorou con respecto ós últimos meses, manterán as protestas para evitar novos retrocesos chegando mesmo a Compostela onde teñen previsto mobilizarse o próximo día 16.

Os usuarios do estadio da Alta na Pobra demandan a apertura do módulo cuberto de atletismo. A pesar de que as obras finalizaron hai xa un ano, a instalación permanece pechada e xa presenta deficiencias pola falla de uso.

A alcaldesa de Ribeira participou esta mañá no acto de clausura dos obradoiros de conciliación desenvolvidos durante o Nadal. 45 nenos participaron nas actividades de lecer desenvolvidas no conservatorio municipal para facilita a conciliación das familias durante o período non lectivo.

O concello de Ribeira vén de sacar a licitación dous proxectos enmarcados no Plan de Sustentabilidade Turística en Destino. Trátase da creación dun miradoiro en Punta do Castro e a restauración do lavadoiro da Penisqueira, dúas actuación que suman un investimento próximo ós douscentos mil euros financiados na súa totalidade con fondos europeos.

Detidos cinco boirenses no marco da operación Zaguanes contra o tráfico de drogas. A Garda Civil desmantelou dous puntos de distribución de substancias estupefacientes no centro de Boiro, relacionados ademais cunha serie de roubos e outras actividades delitivas.

O PSOE de Rianxo pide ó goberno unha mellor xestión da recollida e control de animais abandonados. Recolle así as queixas de diversas entidades e asociacións ó respecto de deficiencias no servizo.

Os veciños do lugar da Costa, na parroquia pobrense do Xobre, levan tempo demandando a instalación dunha rede de pluviais. en época de chuvias, as augas procedentes da Garita inundan os viais e camiños da zona impedindo mesmo o acceso ás súas vivendas.

O BNG de Boiro promove unha campaña de dinamización do comercio local. A través de cartelería e folletos informativos animan á veciñanza a facer as súas compras no comercio de proximidade.

Ribeira organizará un percorrido matutino das súas maxestades a bordo do bus real. A Cabalgata da Tarde incorporará importantes novidades no seu percorrido que por primeira vez pasará polo barrio das Abesadas.