BARBANZA

A Comisión pola Recuperación da Memoria Histórica do Barbanza presentará este venres en Ribeira o libro sobre os irmáns Enrique e Manuel Fernández Sendón. O acto terá lugar a partir das oito da tarde no Centro Cultural Lustres Rivas e contará coa presenza dun dos autores da publicación, Xosé Luís Axeitos.

Ribeira acollerá o 11 de xullo a terceira edición da Noite Tradi. Admais dos grupos locais Bailadela e As Sete Linguas, integran o cartel a formación galega Unto Vello e os valisoletanos ‘Delameseta’.

Barbanza Arousa avanza na súa Viaxe a través da historia dos sabores. Os catro proxectos incluídos no Plan de Sostibilidade Turística encaran a súa recta final. Hoxe, os responsables da entidade visitaron as obras do Museo do Mar de Rianxo que albergará aulas enogastronómicas.

Catorce anos despois, a ruta conmemorativa volverá partir de Ribeira na súa cuadraxésima edición. Ademais do carácter institucional do evento, o concello pretende implicar á cidadanía polo que habilitará un catamarán para acompañar ás numerosas embarcacións participantes.

Nova iniciativa solidaria en Boiro onde a Asociación Española contra o cancro celebrará unha andaina o domingo día 21. A entidade e o concello animan á cidadanía a sumarse a esta proba que ten por obxectivo seguir a recadar fondos para a investigación.

O BNG de Ribeira insta ó goberno municipal a executar a renovación do campo de fútbol de Carreira. Trátase dunha actuación longamente demandada pola veciñanza aprobada polo anterior executivo co voto en contra do PP. A pesar de contar con proxecto e partida orzamentaria aínda non se procedeu á súa licitación.

O concello de Boiro vén de habilitar medio cento de novas prazas de estacionamento no Saltiño. Co acondicionamento dunha parcela como aparcadoiro pretende dar servizo á alta demanda existente na zona onde se empraza o centro de saúde.

A Pobra volverá camiñar unida contra o cancro. O domingo 14 de xuño terá lugar unha nova edición da andaina solidaria. Ademais das probas, que se dividen en dúas distancias, haberá actividades para nenos e animación musical.

O Barbanza sumouse ás mobilizacións convocadas en toda Galicia para denunciar a situación das listas de agarda. Ducias de persoas concentrábanse este mediodía ás portas do hospital comarcal onde as esperas para segundas citas poden chegar a demorarse máis dun ano nalgunhas especialidades.

A reitora da Universidade de Santiago mantivo un encontro cos alumnos que cursan o cuarto ciclo en Ribeira. Trátase da primeira visita oficial de Rosa Crujeiras ó seu concello natal dende que fora elixida máxima responsable da Universidade compostelá converténdose na primeira muller en ostentar este cargo.