Salnés - Caldas

Nova visita da Conselleira de Infraestruturas ao concello de Sanxenxo. Desta volta, María Martínez comprobou o avance das obras de humanización e mellora da mobilidade que se están a desenvolver na contorna da praza de abastos. A actuación conta cun investimento de 2,3 millóns de euros c contempla, entre outras medidas, o soterramento do tráfico na rúa Madrid. A primeira fase da intervención, calculan, estará rematada a principios de outubro.

Visto para sentenza o xuízo contra o home que en 2018 disparou a súa exparella na súa casa do Grove. Tras unha primeira sesión sen acordo, hoxe o acusado recoñeceu os feitos e conformouse cunha pena de prisión de 12 anos. Á saída da Audiencia Provincial de Pontevedra, a vítima da agresión, Eva Afonso, aseguraba que aínda que non está satisfeita co resultado, si supón un alivio que lle permitirá por fin refacer a súa vida.

O 11 de agosto Carril renderá tributo ao seu produto estrela. O pobo vilagarcián acolle a vixésimo novena edición da Festa da Ameixa do Carril, que servirá de antesala das festas de San Roque vilagarciás. Serviranse 3.000 kilos de ameixa xapónica ante a falta no mercado de ameixa babosa. Ademais, este ano por primeira vez na súa historia a festa gastronómica non irá da man do Capítulo da Orde da Ameixa.

Xa está en marcha en Vilagarcía o Campionato do Mundo de Vela Xuvenil. A inauguración celebrouse onte pola tarde, enchendo o centro da vila de ambiente co desfile dos representantes dos máis de 20 países que participan na cita deportiva. Ata o domingo día 21, máis de 400 deportistas percorrerán a ría de Arousa. Este campionato do mundo é para as clases 49er, 49er FX e Nacra 17. Moitas das tripulacións xa levan semanas asentadas en Vilagarcía para facerse co campo de regatas. Entre os representantes galegos, na categoría 49er hai nomes como o do arousán Jacobo García e o campión de Europa xuvenil, o vigués Jaime Wizner. En 49er FX, será a viguesa Stella Enríquez.

Cambados acolleu onte a décima Asemblea Xeral do Grupo de Desenvolvemento Rural Salnés-Ulla-Umia. Un encontro no que se aprobaron as contas anuais de 2023, presentáronse os orzamentos de 2024 e avaliáronse os resultados dos 224 proxectos que conseguiron achegas no marco do programa LEADER 2014-2020. Unhas axudas que roldaron os 2,9 millóns de euros.

Primeira xornada do xuízo contra o home que disparou á súa exparella no Grove no ano 2018. A preguntas da Fiscalía, o acusado asegurou que non recorda nada dos feitos. Enfróntase a unha pena de case 22 anos de cadea.

Iníciase a licitación das obras do novo centro de saúde de Vilagarcía de Arousa. Hoxe a conselleira de planificación de infraestruturas e o seu homólogo de Sanidade visitaron a parcela onde se vai construír o edificio. O novo equipamento suporá un investimento de 19 millóns de euros. A intención é que as obras comecen a finais deste 2024.

Fumata branca en Vilagarcía de Arousa. Despois do achegamento de posturas do pasado venres, PSOE e BNG asinaron hoxe o acordo que permitirá dar luz verde aos orzamentos municipais para este 2024. As contas ascenderán finalmente a 39 millóns de euros, contando cun préstamo que van pedir de ao redor de 4 millóns. Ademais, o PSOE cederá ao BNG o seu posto no Consello de Administración da Autoridade Portuaria. O orzamento irá a pleno o vindeiro mércores 24 de xullo.

Cambados xa conta os días para a súa semana grande. A septuaxésimo segunda edición da Festa do Albariño comezará o vindeiro 31 de xullo, garantindo cinco días de gran ambiente, ampla programación e dos mellores viños na vila cambadesa. Haberá stands das adegas no Paseo da Calzada, o Túnel do Viño no Salón Peña, os concertos na Praza de Fefiñáns e o Xantar de Confraternidade no Pazo Torrado, entre outras citas que non poden perder.

O BNG reuniu hoxe en Vilagarcía aos seus alcaldes e cargos municipais nos concellos da ría de Arousa e do Baixo Ulla afectados pola mina de Touro e a celulosa de ALTRI. No acto, a voceira nacional da formación acusou ao presidente da Xunta de Galicia de poñer en risco a actividade na ría apoiando estes dous proxectos, que cualificou de bombas ambientais. Ana Pontón criticou que se poñan os intereses de dous multinacionais por enriba, dixo, da xente do mar e do marisqueo.