Salnés - Caldas

Ribadumia reforza o seu servizo de recollida de lixo. O concello vén de incorporar nova maquinaria e case 300 colectores para facilitar a separación e reciclaxe dos residuos. A compra supuxo un investimento de 490.000 euros ao abeiro do plan da Deputación de Pontevedra PON2030, cunha achega de 200.000 euros da administración provincial. Os novos recursos tamén permitirán implantar un proxecto piloto de recollida porta a porta na parroquia do Couto de Arriba.

Melloras na contorna das Torres de Oeste, en Catoira. A Xunta destinou 400.000 euros á posta a punto desa zona, incluíndoa creación dun punto de información turística, unha nova iluminación ou a mellora da accesibilidade ao monumento. Ao mesmo tempo o goberno galego reforza a súa colaboración coa Romaría Vikinga.

Chega a quinta edición do Festival de Bandas de Música de Ribadumia. A cita vai ser este vindeiro sábado no auditorio municipal. Na proposta, ademais da formación anfitrioa -a Agrupación Músico-Cultural de Ribadumia-, participarán a banda de música de Arca e a de Agolada.

O BNG traslada o seu apoio á comunidade educativa do colexio A Lomba de Vilagarcía polo peche dunha das aulas de cuarto de infantil. Os nacionalistas levarán ao Parlamento de Galicia e ao pleno do concello este asunto, demandando á Consellería de Educación que manteña esa aula e á profesora desa etapa. Critican que coa medida as ratios das outras dúas aulas dese curso van pasar ao máximo cando, apuntan, debera ser todo o contrario.

O colectivo que ata o de agora impulsaba esta iniciativa deu un paso atrás, pero no municipio non queren que desapareza este evento. Nesta ocasión, o concello traerá ata A Armenteira a 'Allo negro', que ofrecerá un concerto o vindeiro 18 de xullo.

A ANPA do colexio A Lomba, en Vilagarcía, disposta a dar guerra trala decisión da Consellería de Educación de eliminar unha das tres liñas previstas para cuarto de infantil. Tamén dunha praza de profesora desta etapa educativa. As nais e pais denuncian que se trata dun engano, xa que a medida tómase despois de pechar o prazo de matriculación. Tamén insisten en que eliminar unha das aulas suporía un importante golpe á calidade do ensino. Hoxe mantiveron un encontro coa dirección do centro. Ademais, están a buscar o apoio da corporación vilagarciá ás súas demandas.

O concello de Cambados prepárase para a Festa do Albariño tamén dende o punto de vista da seguridade. Este venres celebrouse a xunta local de seguridade, na que participou o subdelegado do goberno na provincia e os distintos corpos, para perfilar o dispositivo previsto para unhas datas nas que se agardan na vila unhas 200.000 persoas. No encontro tamén se repasaron outros datos relativos á seguridade na vila. Abel Losada, o subdelegado, apunta que Cambados é un municipio 'extremadamente seguro', destacando que o índice de criminalidade baixou nestes primeiros meses do ano.

O persoal de Valoriza, que ese encarga da recollida de lixo para a Mancomunidade do Salnés en Cambados, Vilanova e Meis anuncia protestas na defensa dos seus dereitos laborais. Reclaman un novo convenio no que as melloras que se pacten sexan incorporadas ao prego de condicións do concurso de adxudicación do servizo. Denuncian que nestes momentos teñen uns salarios moi baixos.

Durante toda esta fin de semana Cambados convértese en punto de encontro de creadoras e emprendedoras, en feminino. O paseo da Calzada acolle ata este domingo unha nova edición da Feira Produtoras. Un total de 30 proxectos danse cita nesta iniciativa, que trae á vila propostas de distintos sectores, como roupa, artesanía ou alimentación. Todos cun nexo común: detrás deles hai mulleres que buscan darlle visibilidade ao seu proxecto a través de propostas como esta.

O Servizo de Gardacostas conta dende hoxe cunha nova patrulleira. Vilanova de Arousa acolleu o acto de entrega, encabezado polo presidente da Xunta de Galicia. Alfonso Rueda sinalou o compromiso da Xunta con dotar ao servizo dunha frota máis moderna e eficiente. Esta é a sexta que se suma ao equipo dende o ano 2018.