Salnés - Caldas

A adega ATTIS conmemora o seu 25 aniversario. Este martes, organizou en Meaño un acto conmemorativo para repasar este primeiro cuarto de século de traxectoria. Neste tempo, esta adega familiar foi expandindo o seu proxecto, elaborando viños brancos e tintos cun total de 20 marcas. Ademais, está presente a día de hoxe en 25 países.

A Xunta declara Proxecto de Interese Autonómico a ampliación das instalacións de Adegas Martín Códax. A cooperativa ten prevista unha actuación que abarca máis de 47.000 metros cadrados, cun investimento de máis de 18 millóns de euros. O proxecto busca adaptar as distintas áreas ao incremento da súa capacidade produtiva. Tamén se habilitarán novos espazos para a área de enoturismo.

Posta de longo das novas instalacións de Mariscos Gilmar, en Vilanova. A compañía investiu 1,2 millóns de euros na ampliación da súa planta no polígono de Tremoedo. Con 40 anos de traxectoria especializada na transformación e produción de polbo, Gilmar abre agora unha nova etapa, coa incorporación de nova tecnoloxía, a mellora dos procesos produtivos e o avance cara a novos mercados.

A Mancomunidade do Salnés clausura a décimo cuarta edición do seu Programa Integrado de Emprego superando todas as expectativas de inserción laboral. Actualmente, 83 dos 100 candidatos xa están traballando. Cando no arranque do programa o obxectivo era de 45. Unhas cifras que acreditan o bo funcionamento desta iniciativa, que articulou a realización de 30 cursos, 9 obradoiros de emprego e máis de 600 orientacións laborais.

O alcalde de Vilagarcía formalizou este luns a denuncia contra o home que o agrediu esta fin de semana nun local hostaleiro da cidade. O varón atacou a Alberto Varela propinándolle dous golpes nas costas e agarrandoo polo pescozo ao berro de ‘rojos de mierda’ e ‘iros de putas con Ábalos’. O socialista asegura que reflexionou sobre presentar ou non a denuncia. Asegura que o fai como xeito de chamar a atención sobre a gravidade que ten normalizar o insulto por razóns ideolóxicas e a escalada violenta que se está a producir como consecuencia.

Preocupación nas industrias gandeiras en Galicia polo incremento de custos, en especial, dos carburantes. Nunha visita ás instalacións de Clesa en Caldas, o presidente da Agrupación de Cooperativas Lácteas trasladoulle esta inquedanza á Conselleira do Medio Rural. María José Gómez aproveitou para lanzar unha mensaxe ás industrias, para que ese incremento dos cursos repercuta tamén nos produtores. Pide un esforzo ás industrias e tamén aos consumidores, para que aposten polos produtos do país.

Pedro Sánchez arroupa a Festa do Marisco do Grove na súa xornada inaugural. Horas antes de participar no Foro da Toxa, o presidente do goberno visitou a carpa gastronómica no arranque desta 63 edición entre apupos e aplausos. Estivo acompañado de distintas autoridades, entre elas, o alcalde do Grove e outros rexedores da zona, así como o secretario xeral dos socialistas galegos. Calcúlase que unhas 100.000 persoas pasarán por este evento ata o vindeiro 12 de outubro.

O GDR Salnés Ulla Umia aproba máis de 650 mil euros en axudas para proxectos privados. Son fondos da convocatoria 2026-2028 que benefician iniciativas de diferentes eidos, tanto produtivas como non produtivas. Unha nova aposta do GDR por dinamizar e crear oportunidades no rural.

Xunta de Galicia e concello de Vilanova colaborarán para levar adiante a reforma integral do centro de saúde do municipio. Esta mañá selaron este acordo coa sinatura dun convenio polo cal cada administración asumirá a metade do investimento necesario. O custo da obra está orzamento en 304.000 euros.

Empeoran as listas de espera na área sanitaria de Pontevedra e O Salnés. A 30 de xuño, o tempo medio de agarda por unha cirurxía era de 90,7 días, un mes máis que no balance anterior. No caso das consultas con especialistas, a espera media está en 70 días. Dende a xerencia apuntan que son cifras que recordan aos niveis postpandemia e responsabilizan á folga de médicos contra o estatuto marco e ao absentismo nas citas.