Vilagarcía

No instituto Castro Alobre de Vilagarcía organizaron hoxe unha saída do armario conxunta. A iniciativa busca visibilizar o colectivo LGTBIQ+, fomentando a tolerancia e o respecto entre o alumnado. Está impulsada polo Grupo de Diversidades afectivo sexuais do centro.

A pista de atletismo de Fontecarmoa, en Vilagarcía, estrea nova iluminación. As obras nesta instalación deportiva encaran a súa recta final, coa mellora do tapiz que permitirá a esta pista acoller competicións oficiais. Esta mañá visitaron o espazo o alcalde da cidade e o presidente da Deputación de Pontevedra, que subliñaron a importancia da colaboración entre administracións.

Na praza de abastos de Vilagarcía presumen unha vez máis da calidade do seu produto. Desta volta fano a través das xornadas 'O calendario da ría na túa mesa', unha proposta que serve para promocionar os peixes e mariscos de proximidade. O cociñeiro Xoanqui Ameixeiras protagonizou hoxe esta actividade, que continuará ao longo dos vindeiros meses.

As familias do colexio de Rubiáns están en pé de guerra polos horarios imposibles que teñen no centro. A rapazada entra contra as dez da mañá e, ao mediodía, case non teñen tempo para comer no comedor. Explican que o problema parte dos horarios do autobús escolar e que se solucionaría contando cun autobús máis. As nais e pais denuncian que levan case seis meses agardando por unha resposta da Xunta a un problema, lembran, que veñen sufrindo no centro dende hai 17 anos. Agora, puxeron en marcha xunto con Zona Aberta unha nova campaña para denunciar a súa situación.

Zona Aberta de Vilagarcía fai un balance moi positivo da campaña de verán. Dende o colectivo de comerciantes e hostaleiros explican que a tempada foi moi boa en canto a vendas. Aseguran que detectaron nos últimos meses un repunte de clientela que se achega aos seus establecementos, atraída pola oferta ampla e todos os servizos que ofrece a cidade. Agora, na entidade traballan xa coa vista posta na campaña de Nada.

Clara Campoamor xa forma parte do rueiro de Vilagarcía. A cidade despediuse hoxe da rúa Conde Vallellano, ministro franquista, en cumprimento da Lei de Memoria Democrática. Este é o primeiro dos cambios previstos porque nos vindeiros meses tamén mudarán Xeneral Yagüe ou Almirante Fontán. Tamén se renovarán nos vindeiros meses todas as placas de rúas e parroquias do municipio.

Un día despois de asinar o acordo co PSdeG para a apoiar os orzamentos de Vilagarcía, o BNG defende que as súas achegas poñen as persoas no centro e definen o modelo de cidade. Aínda que lamentan que a aprobación das contas chega tarde, reivindican que son máis sociais e cun potente capítulo de investimentos no que o rural tamén vai estar moi presente.

Acordo entre o goberno local de Vilagarcía e o BNG para sacar adiante os orzamentos municipais. O alcalde da cidade e o voceiro nacionalista asinaron esta mañá un acordo que lle permite aos socialistas sacar adiante no pleno deste xoves as contas, que ascenden a 39,4 millóns de euros. No documento asinado hoxe recóllese tamén un compromiso para sacar tamén adiante as contas de 2026 no primeiro trimestre do ano que vén.

Comeza o curso escolar. Hoxe foi día de volta ás aulas para o alumnado de toda Galicia. Moitos nervios, algo de sono e, sobre todo, moitas ganas de reencontrarse coas amizadas neste primeiro día. Para as familias, xornada de volta á rutina, moi necesaria para conciliar o persoal co laboral. O CEIP de Rubiáns, en Vilagarcía, organizou neste arranque do curso unha feira. Coa rapazada disfrazada de animais de granxa, a actividade serviu para facer máis levadeiro este regreso ás clases.

Milleiros de persoas mobilizáronse onte en Galicia para protestar contra a vaga de lumes que está a arrasar principalmente a provincia de Ourense. Houbo concentracións en diferentes localidades do territorio. Entre elas, Vilagarcía e Pontevedra. Os centos de participantes criticaron tamén a política forestal da Xunta de Galicia ao berro de ‘Lumes forestais nunca máis’.