Vilagarcía

A protectora de Animais de Vilagarcía fai 30 anos. Para celebralo, a entidade organiza un concerto solidario o vinderio venres día 11 no Auditorio da Cidade. Trátase dunha cita na que participarán Pablo Vidal e Clara Pino, Chaladura Rock e Intro Cover. O prezo das entradas será de tres euros e ademais tamén se vai habilitar unha fila 0.

En Vilagarcía, a Casa do Concello pode chegar a reduci-la súa factura da luz ata nun 50% grazas aos seus novos paneis de enerxía solar. Foron instalados na azotea do consistorio. Segundo estiman, o novo equipamento produce uns 20 kilovatios. Detrás deste proxecto está o obradoiro de emprego Labora Xove de enerxías renovables.

Os afeccionados ao mundo do motor déronse cita este domingo en Vilagarcía. A cidade acolleu a segunda edición da concnetración Ride’N Nice, unha iniciativa aberta a todo tipo de vehículos, sen importar marca ou a súa idade. No evento participaron uns 200 coches.

Xa está operativa a nova base da ambulancia medicalizada do 061 no Hospital do Salnés. As instalacións, renovadas e máis amplas, recibiron hoxe a visita do conselleiro de Sanidade. Un acto que se fixo coincidir co retorno da ambulancia medicalizada a este centro hospitalario despois de operar durante todo o verán dende Sanxenxo. A pesares da polémica, dende o 061 non aclaran se esta medida se volverá repetir o vindeiro ano.

O Capítulo da Orde da Ameixa estreou este ano localización. A cita celebrouse no Pazo da Golpelleira, en Vilagarcía, despois da ruptura entre a directiva dos Parquistas de Carril e a confraría. O que non cambiou foi a esencia do acto, no que se nomearon as novas donas e cabaleiros que xa son membros da orde.

O BNG do Salnés reclama á Xunta de Galicia que devolva a base da ambulancia medicalizada ao Hospital do Salnés. Co inicio do verán trasladouse a Sanxenxo para atender o incremento de poboación polo turismo. Aquí continuará ata o 31 de agosto, deixando desprotexida, din, á poboación desta zona. A formación nacionalista reuniuse hoxe en Vilagarcía co persoal deste servizo. Reclaman que, en lugar de trasladar a ambulancia medicalizada, se dote Sanxenxo con outro equipamento.

O posible cambio dunha parada de autobús en Vilaxoán, no concello de Vilagarcía, enfada e moito aos veciños. Decenas de persoas concentráronse para opoñerse a esta modificación, que afecta á zona do Freixo. Aseguran que o bus para neste punto dende hai máis de 50 anos e culpan directamente á asociación de veciños de propiciar o cambio. O colectivo cre que as manobras do autobús neste punto non son seguras.

O 11 de agosto Carril renderá tributo ao seu produto estrela. O pobo vilagarcián acolle a vixésimo novena edición da Festa da Ameixa do Carril, que servirá de antesala das festas de San Roque vilagarciás. Serviranse 3.000 kilos de ameixa xapónica ante a falta no mercado de ameixa babosa. Ademais, este ano por primeira vez na súa historia a festa gastronómica non irá da man do Capítulo da Orde da Ameixa.

Xa está en marcha en Vilagarcía o Campionato do Mundo de Vela Xuvenil. A inauguración celebrouse onte pola tarde, enchendo o centro da vila de ambiente co desfile dos representantes dos máis de 20 países que participan na cita deportiva. Ata o domingo día 21, máis de 400 deportistas percorrerán a ría de Arousa. Este campionato do mundo é para as clases 49er, 49er FX e Nacra 17. Moitas das tripulacións xa levan semanas asentadas en Vilagarcía para facerse co campo de regatas. Entre os representantes galegos, na categoría 49er hai nomes como o do arousán Jacobo García e o campión de Europa xuvenil, o vigués Jaime Wizner. En 49er FX, será a viguesa Stella Enríquez.

Iníciase a licitación das obras do novo centro de saúde de Vilagarcía de Arousa. Hoxe a conselleira de planificación de infraestruturas e o seu homólogo de Sanidade visitaron a parcela onde se vai construír o edificio. O novo equipamento suporá un investimento de 19 millóns de euros. A intención é que as obras comecen a finais deste 2024.