PONTEVEDRA

4,6 millóns de euros e 12 meses de traballos serán necesarios para levar adiante a renaturalización do río dos Gafos ao seu paso por Campolongo. Hoxe o equipo redactor presentou o ambicioso proxecto, que supón liberar a canle do río dunha cuberta de máis de sete mil metros cúbicos de formigón. As obras tamén se dirixirán a facer o trazado do Gafos máis natural e a restaurar un ecosistema que non existe na actualidade.

A Garda Civil conta dende hoxe cun novo coronel xefe na Comandancia de Pontevedra. Manuel Touceda asumiu esta mañá o cargo nun acto presidido polo delegado do Goberno en Galicia. Pedro Blanco expresou a túa 'total confianza' na súa incorporación, augurando excelentes resultados para a seguridade da provincia de Pontevedra. O delegado apuntou que Touceda representa a modernidade e adaptación da Benemérita ás novas necesidades da sociedade.

Hoxe en Pontevedra celebrouse unha nova reunión do comité organizador da gran cita deportiva que neste mes de xuño acollerá a cidade: o Campionato do Mundo de Tríatlon Multideporte. As cifras avalan a súa relevancia: está prevista a participación de máis de 4.000 deportistas e a chegada de máis de 15.000 visitantes á cidade. Para facela posible, as administracións e entidades colaboradoras achegarán un orzamento de 2,9 millóns de euros.

Introducir cambios no Plan Especial de Protección e Reforma Interior e Conservación Artística, coñecido como Peprica, non entra nos plans do concello de Pontevedra. A pesares de que o ocio nocturno continúa a denunciar o goteo de peches de locais no Casco Histórico polas restricións da norma, o goberno local defende que a ordenanza permite que a zona vella pontevedresa sexa un referente. Pola súa banda, o Partido Socialista pide unha actualización do Peprica para evitar o declive do ocio nocturno na cidade.

O Partido Socialista de Pontevedra propón bonificacións no IBI ás vivendas en alugueiro con renda limitada. Algo que debería facerse, cren dende o PSOE, ao tempo que se avanza nos traballos para declarar a cidade como zona tensionada. Iván Puentes calculou que no concello hai agora mesmo ao redor de 6.000 vivendas baleiras. Na moción que levarán ao vindeiro pleno, os socialistas piden tamén bonificacións no IBI de ata o 50% para vivendas con instalacións de aproveitamento térmico ou eléctrico de enerxía solar.

Xa está en marcha o foro 'As mulleres que opinan son perigosas' na cidade de Pontevedra. Un total de 15 profesionais pasarán polo escenario do teatro principal, nunha cita que volve ás súas orixes oito anos despois, poñendo de novo o xornalismo no centro do debate. Esta mañá tivo lugar a inauguración do foro, no que as súas impulsoras, Diana López e Susana Pedreira, reivindicaron a necesidade de apostar por un xornalismo con perspectiva feminista.

A Semana Galega de Filosofía que se celebra en Pontevedra vai estar dedicada ao nihilismo. Trátase dun pensamento que considera que ao final todo se reduce a nada e que, polo tanto, nada ten sentido. A organización decidiu traer esta doutrina á actualidade denunciando a falta de valores ou incluso o malestar instalado en boa parte da sociedade. Nesta edición participará unha quincena de relatores. Vaise celebrar do 21 ao 25 de abril.

Os traballos para a reforma da antiga sede de Facenda en Pontevedra están a piques de comezar. Hoxe anunciouse o inicio inminente da primeira fase da súa rehabilitación, que consiste no arranxo das cubertas. A partir de aquí iníciase un longo percorrido para a transformación deste edificio anexo ao Convento de San Francisco na nova sede do arquivo provincial. Este histórico inmoble leva pechado 15 anos e hoxe puido acceder ao seu interior unha cámara de Canal Rías Baixas.

O campionato celebrarase na cidade do 20 ao 29 de xuño. Para dar resposta a todas as necesidades, a organización fai un chamamento á veciñanza a que forme parte do equipo de voluntariado. Con esta campaña agardan chegar axiña ás 350 persoas anotadas. A elas hai que sumar tamén a colaboración da Brilat, Protección Civil, Garda Civil de Tráfico e Policía Local. Todo para que evento deportivo máis importante deste ano na cidade sexa un éxito.

O concello de Pontevedra ve con bos ollos o proxecto da Xunta para converter o actual complexo de Cernadiñas Novas, en Santo André de Xeve, no primeiro centro de alto rendemento deportivo de Galicia. Onte o consello do goberno galego declaraba o interese autonómico do proxecto, ao que destinará ao redor de 30 millóns de euros. Esta mañá o alcalde pontevedrés anunciaba a súa intención de solicitar un encontro coa Xunta para evitar duplicidades entre esta instalación e outras que ten proxectadas o goberno municipal, como o pavillón da Parda.