PONTEVEDRA

O Banco de Alimentos prepárase para a Gran Recollida deste 2026.  Na provincia de Pontevedra participarán uns 150 establecementos. Para iso, precisan 2.700 voluntarios, co obxectivo de conseguir igualar a cifra de alimentos recollidos o ano pasado. Na última campaña deron recollido 325.000 quilos de alimentos. Con eses recursos poderían cubrir as necesidades das 20.000 persoas que atenden dende a entidade.

‘Tomámolo a peito’ é o lema co que hoxe, Día Mundial contra o cancro de Mama, saíu á rúa a Asociación Española contra o Cancro en Pontevedra. Esta mañá instalaron unha mesa na Praza de España para informar, sensibilizar e visibilizar a realidade da enfermidade e das persoas que a padecen. Non en van, o cancro de mama é o que presenta unha maior incidencia en Galicia entre as mulleres.

Unanimidade no pleno municipal de Pontevedra para buscar unha solución ao problema de abastecemento de auga potable no colexio de Xeve. PP, BNG e PSOE apoiaron a moción levada á sesión polos socialistas, reclamando ao concello a toma de medidas urxentes para rematar cunha situación que se prolonga xa 15 meses. O debate foi seguido dende o público por un grupo de representantes da comunidade educativa do centro.

Dende a Deputación de Pontevedra, o presidente pronunciouse sobre este anuncio. Luis López acusou ao concello de ir a rebufo dos anuncios realizados polo vicepresidente Rafa Domínguez no que ao estadio de Pasarón se refire. Recordou que a Deputación leva a este pleno unha modificación de crédito de máis de 800.000 euros para participar no financiamento destes traballos de reforma. Tamén insistiu en que se trata dun estadio de titularidade municipal.

O concello de Pontevedra comprométese a achegar os recursos que sexan necesarios para executar a reforma estrutural do estadio de Pasarón. BNG e PSOE compareceron hoxe xuntos para anunciar que colaborarán para aprobar esta achega aínda por determinar, que se consignará nos orzamentos do 2027. Polo de momento, o goberno local está a traballar nos pregos para sacar a licitación a realización do proxecto. Dende o executivo non se atreven a dar prazos e advirten: a obra será lenta cara e dolorosa.

Os xardíns de Santa Clara abrirán á cidadanía no 2027. É a data anunciada hoxe polo vicepresidente da Deputación de Pontevedra. Segundo Rafa Domínguez, proximamente porase en marcha un proxecto de recuperación paisaxística e acondicionamento funcional, dotado cun orzamento de máis de 820.000 euros. O prazo de execución será de catro meses pero a apertura tardará ao redor de 8 ou 10 meses.

A campaña de vacinación da gripe xa está en marcha nos centros escolares. Na área sanitaria de Pontevedra e O Salnés son nove os que están a participar neste programa piloto. Un deles, o CEIP A Xunqueira 2 de Pontevedra. Comezaron esta mañá, vacinando ao alumnado de 3 a 11 anos na biblioteca do centro e sen picadas.

A Universidade de Vigo desembarcará no Edificio Maruxa Mallo. A entidade e o concello de Pontevedra acordaron que o grupo de investigación dirixido por Mario Pansera ocupará o terceiro andar do inmoble. Un acordo inicial que as dúas partes están dispostas a ampliar. Sobre a mesa está a posible implantación definitiva do proxecto de especialización do Campus Crea neste espazo.

A Subdelegación do Goberno en Pontevedra acolleu esta mañá a reunión anunciada para analizar e coordinar o plan de tráfico que se porá en marcha con motivo da reanudación das obras do nó de bombeiros. Para Abel Losada, o encontro serviu para engraxar a colaboración entre as partes implicadas, entre elas os concellos de Poio e Pontevedra. Pero ao seu remate, o alcalde capitalino Miguel Anxo Fernández Lores cuestionou a planificación das obras. Dixo que saíu do encontro máis preocupado do que entrara.

A Xunta reforza a súa aposta polo Camiño do Litoral. O goberno galego puxo en marcha unha campaña de promoción para convertelo nunha experiencia cada vez máis visible, máis accesible e máis conectada cos viaxeiros e os concellos galegos. A campaña está destinada aos 78 municipios que forman parte do itinerario desta ruta costeira.