Pontevedra

As obras de rehabilitación dos edificios centrais do Museo de Pontevedra poderían iniciarse a finais do 2025. Así o anunciou hoxe o vicepresidente da Deputación de Pontevedra. Rafa Domínguez presentou tamén outros dos detalles do proxecto para a consolidación, restauración e interconexión dos dous inmobles, que levan pechados ao público 11 anos. A intención é construír un paso soterrado de 500 metros cadrados que una o Castro Monteagudo e o García Flórez.

Mañá diferente para as xogadoras do Club de Baloncesto Arxil, de Pontevedra. Hoxe toda a plantilla participou nunha actividade en colaboración coa Escola de Piragüismo Ciudad de Pontevedra. Saíron navegar nos barcos dragón xunto as Libélulas, o equipo composto por mulleres con cancro de mama. Un xeito de recordar a Maite Méndez, histórica adestradora do Arxil falecida este mes de abril.

Esta fin de semana culminaron en Pontevedra os actos para celebrar o 25 aniversario de Miguel Anxo Fernández Lores na alcaldía. Foi cunha cita política no Teatro Principal, na que non faltaron moitas das persoas que o acompañaron neste tempo. Tamén asistiu a voceira nacional do BNG, Ana Pontón.

A Xunta desbloquea a variante de Alba. A Consellería de Infraestrutura dará o visto bo a este proxecto, que leva reivincidanco o concello de Pontevedra dende hai vinte anos. Para iso, o goberno galego só pon como condición que o Ministerio de Transportes confirme a súa autorización para unir a nova vía coa estrada de Santiago a través dunha glorieta. O proxecto, paralizado polo goberno galego no 2019, retomarase agora co trazado proposto pola Xunta e o deseño do Concello.

Xuntanza entre a Deputación de Pontevedra e o concello capitalino para desbloquear proxectos conxuntos que están pendentes. Trátanse das obras de rehabilitación interior da Casa Consistorial, do proxecto de acondicionamento da parcela sobre a vía do tren na rúa 12 de novembro e do novo viario de interconexión entre a rúa Rosalía de Castro e a avenida de Marín, en Mollabao.

1.700 deportistas daranse cita esta fin de semana en Pontevedra nos campionatos de España de Tríatlon por Clubes e por Relevos Mixtos. O evento supón tamén o punto e final á Liga Nacional de Clubes de Tríatlon, polo que será en Pontevedra onde se decida a competición deste ano e onde se van xogar os ascensos e descensos.

Xa coñecemos a programación completa do festival BDra Gráfica, a cita que do 27 ao 30 de xuño converterá á cidade de Pontevedra na capital do cómic peninsular. Na carpa que se instalará na praza da Ferrería localizaranse 24 postos de librarías e editoriais e nestes días pasarán ao redor de 40 autores. Presentacións de libros, exposicións e mesmo proxeccións de cinema relacionado coa BD, son outras das propostas que traerá este festival.

Pontevedra estrea o seu primeiro parque de actividade física deportiva. A instalación xa está aberta ao público á beira do Lérez, na antiga parcela de Tafisa. Aquí calquera persoa poderá exercitarse e traballar cos diferentes aparellos que forman esta área da Ponte dos Tirantes, das máis avanzadas do mercado.

O Mercado de Abastos de Pontevedra será o escenario o vindeiro 21 de xuño dunha Festa Feminista. A cita enmárcase no programa de actividades deseñado polo concello co gallo do 8 de marzo, dentro da campaña ‘Ábrelle a porta ao feminismo’. A celebración contará coa presenza da guionista e cómica Henar Álvarez, que presentará o seu libro Ansia e participará posteriormente nun faladoiro. A festa rematará, como non podía ser doutro xeito, con música.

Fomentar a cultura do emprendemento no eido educativo é o obxectivo que persegue Depoemprende na Escola, o programa impulsado dende a Deputación de Pontevedra. Hoxe dende a Praza da Peregrina da capital pontevedresa despediuse unha nova edición. Preto de 300 alumnos de toda a provincia instalaron os postos das cooperativas nas que levan traballando todo o curso.