crb

Tráxico festivo nas comarcas do Barbanza e Muros-Noia. Un veciño Muros perdeu a vida nun accidente acontecido no termo municipal de Outes de madrugada. En Ribeira, aínda que non houbo que lamentar vítimas o susto foi tremendo despois de que un vehículo invadira unha zona peonil a gran velocidade colidindo contra o mobiliario urbano.

O executivo de Boiro debate en pleno a aprobación inicial da RPT. O documento contempla a actualización e modificación das funcións dos máis de 200 traballadores do concello así como o incremento salarial que suporá un investimento de máis dun millón de euros.

Podemos Galicia demanda unha solución urxente ós vertidos da Ribeiriña. A súa coordinadora, Isabel Faraldo, visitou a zona para coñecer o alcance do problema no que deben implicarse tódalas administracións.

A Plataforma en Defensa da Sanidade Pública do Barbanza fai unha chamada á participación na manifestación convocada por SOS Galicia para este domingo en Santiago para reclamar melloras na atención primaria e hospitalaria, e en contra da privatización e o desmantelamento da sanidade pública. A entidade alugará varios autocares con saídas dende os catro concellos de Barbanza-Arousa, para poder asistir a esta gran mobilización en Compostela.

Ademais de asociacións e cidadáns anónimos, a mobilización contou coa presenza de tódalas forzas políticas agás o PP. Tamén se sumaron á protesta colectivos ecoloxistas de toda Galicia.

Ribeira acolleu a presentación do Manual para a Implementación de Laboratorios de Innovación Trasnformadora en concellos e cámaras municipais. Trátase dun proxecto piloto que vén de poñer en marcha o Eixo Atlántico co obxectivo de incrementar a cohesión social e territorial dos municipios.

A Asociación de Amas de Casa de Ribeira volverá homenaxear ós maiores do municipio cunha xornada de confraternidade. Será o domingo día 9 cunha chocolatada e posterior baile no restaurante Baiuca.

Os concellos do Barbanza dan un paso máis á hora de mancomunar servizos. Rianxo, Boiro e A Pobra están a estudar un sistema conxunto de xestión de residuos que permita abaratar os custos e prestar un mellor servizo á veciñanza.

A Asociación AMICOS clausurou esta mañá na Pobra o proxecto Climability. A través desta iniciativa desenvolveuse un estudo sobre os efectos do cambio climático e a adopción de solucións baseadas na propia natureza.

A alerta laranxa polo temporal costeiro non foi quen de disuadir ós veciños de Aguiño que un venres máis saíron á rúa para reclamar dous médicos a tempo completo. Ademais do reparto de pancartas para colgar nos balcóns, anunciaron que a próxima semana levarán a súa protesta ata Santiago.