Deportes

Esta mañá presentábase a undécima edición da BTT Ría de Noia. A proba, organizada polo Club Ciclista Toxo, celebrarase o domingo 9 de marzo. Nela prevese unha participación próxima ós 400 corredores.

Multitudinaria concentración no Grove en repulsa polo falecemento de Andrés Rico, logo de sufrir unha agresión nun partido de balonmán en Vilalonga. A corporación municipal ao completo encabezou un minuto de silencio. Ao acto tamén asistiron o alcalde e concelleiros de Sanxenxo e o presidente da Federación Galega de Balonmán. Todos fixeron un chamamento a reflexionar sobre o acontecido e o incremento da violencia no deporte.

Falece o afeccionado agredido hai dous meses nun partido de balonmán no Grove. Trátase de Andrés Rico, un veciño do Grove de 68 anos. Levaba na UCI dende o 15 de decembro, logo de ser agredido nun partido da categoría cadete entre O Rasoeiro e o Sanxenxo que estaba a arbitrar o seu neto. Foi agredido por un seareiro do Rasoeiro, logo de pedirlle que deixase de insultar ao árbitro. O concello do Grove decretou tres días de loito e convocou unha concentración para este martes.

Noia celebra este sábado a terceira edición do memorial Tono Da Silva. Organizado polo Club SKT, a cita terá lugar nos locais da Sociedade Liceo a partir das seis e media da tarde. A velada incluirá varios combates de púxiles locais, entre eles Silvestre Gómez, que debuta no boxeo profesional.

Noia acollerá este vindeiro domingo unha nova andaina. A proba, organizada polo Club Trabandainas, forma parte da Liga Galega de Andainas 2025 e está incluída tamén na Liga Ibérica de Sendeirismo.

A proba, organizada polo Club Deportivo International Trekkers Barbanza-Sar, terá lugar os días 21 e 22 de xuño. A Pobra será saída e chegada desta edición, percorrendo posteriormente tamén os municipios de Boiro, Rianxo, Lousame, Noia, Porto do Son e Ribeira.

Ribeira entregou este mediodía as bolsas ós 20 deportistas non profesionais da localidade para que poidan seguir desenvolvendo a súa actividade. O acto de entrega estivo presidido polo alcalde, Luís Pérez Barral, e o edil de Deportes, Xabier Vidal.

Deporte e solidariedade volven ir da man nunha iniciativa impulsada dende a Escola de Boxeo El Canario e o Club de Natación. Trátase dunha carreira e unha andaina que buscan recadar fondos en favor do Club de Remo Puebla, afectado tralo incendio que destruíu as súas instalacións. A cita será este vindeiro domingo 2 de febreiro.

O programa Xogade reúne este sábado en Poio a preto de 500 escolares no Campionato Galego de Cros. Trátase dunha proba destinada ás categorías alevíns, infantís e cadetes. Vaise disputar na Seca entre as 10.00 e as 13.00 horas. Ata o concello achegaranse nenos e nenas de 52 clubs, 26 centros educativos e tres escolas deportivas municipais de toda Galicia.

Ribadumia prepárase para unha nova edición do Arousa Fútbol 7 Indoor. O municipio acolle por quinto ano consecutivo este torneo, que se vai disputar entre esta fin de semana e o 4 de xaneiro. Na cita reuniranse 35 equipos de toda Galicia, implincando a máis de 370 xogadores e xogadoras.