BARBANZA

Rianxo conmemorará o Día Mundial do Autismo cunha programación especial orientada a  reivindicar a necesidade de contribuír a mellorar a calidade de vida das persoas que padecen este trastorno. Entre as actividades a realizar figura unha andaina solidaria que o Concello organiza da man da asociación BarbanTEA. A cita será o domingo 6 de abril.

A corporación municipal de Rianxo celebra arestora unha sesión plenaria na que se somete a aprobación poder acollerse a unha subvención do Instituto para a Diversificación e Aforro da Enerxía, o IDAE,  para renovar o alumeado público en varias zonas do casco histórico aínda pendentes. O proxecto proposto ascende a uns 547 mil euros e en total cambiaranse unhas 468 luminarias.

A PDRA convoca este sábado na Pobra unha gran mobilización en contra da macrocelulosa de Altri. Colectivos de toda Galicia marcharán por terra e por mar para amosar a súa oposición a este proxecto que vén de recibir a declaración de impacto ambiental favorable por parte da Xunta.

O presidente da Federación Galega de fútbol desprazouse ata Boiro para coñecer o proxecto de ampliación do campo de Barraña. O concello traballa na compra duns terreos anexos para construír unha cidade deportiva.

Ana Peleteiro e César Carballeira foron distinguidos pola Deputación da Coruña como mellores deportistas da provincia. Entre os premiados destaca tamén a empresa Congalsa polo seu labor de promoción do deporte base na comarca do Barbanza.

O PP de Boiro denuncia o retraso no pago das axudas a deportistas federados. Os populares critican tamén, que a día de hoxe, o 30% das subvencións a clubs e entidades deportivas seguen pendentes de realizarse.

A xunta local da Asociación Española contra o Cancro de Ribeira celebrará o sábado 12 de abril a súa Gala Benéfica. Agardan recadar preto de dez mil euros que se destinarán á investigación oncolóxica.

Tonhito de Poi volverá guiar ós visitantes polos Mitos e Lendas de Ribeira. O concello pon en marcha a segunda edición desta ruta que se desenvolverá nos meses de abril, maio e xuño. Ademais dun itinerario guiado, os asistentes gozarán dun concerto e degustación gastronómica.

O executivo boirense dá por concluídas as obras de mellora levadas a cabo nun camiño de acceso a varias vivendas e parcelas agrícolas no lugar de Nine, na parroquia de Cespón. A actuación, que responde a unha demanda realizada polos propios veciños da zona, contou cun investimento de máis de 60 mil euros, financiada en parte cunha achega da Axencia Galega de Desenvolvemento Rural.

Á posta en marcha por primeira vez o pasado ano dunha liña de subvencións destinada á dinamización do comercio local, a través das propias asociacións locais de comerciantes, súmase este ano outra, co fin  de atraer empresas para o municipio.