BARBANZA

Esta mañá presentábase en Ribeira a cuarta edición do Open de Spinning de Galicia. No campionato prevese unha participación dunhas 170 persoas.

Os populares da Pobra critican o cambio de postura do executivo en relación ás naves dos Areos. Tras anos apostando pola súa recuperación propoñen agora o derrube das fábricas. Aínda que dende o PP sempre defenderon esta opción, entenden que se teñen perdido fondos para acometer esta actuación ó longo dos últimos anos ante a negativa do goberno.

O executivo de Ribeira sacou adiante a súa proposta de orzamentos para 2024. O pleno deu luz verde á tramitación inicial das contas a pesar da oposición do PP que criticou duramente o retraso na aprobación así como a falla de diálogo para achegar propostas.

Visibilizar a importancia da saúde mental e rachar cos estigmas aínda presentes na sociedade. Este é o obxectivo principal do Día Mundial da Saúde Mental que se conmemora hoxe. O concello de Ribeira celebrou esta mañá un coloquio, organizado pola asociación A Creba, coa intervención de distintos expertos na materia dende o punto de vista sanitario e social.

A Consellería do Mar e as federacións de confrarías traballan no deseño do plan de explotación do polbo na busca dunha xestión máis eficiente e sostible do recurso. Estudan a ampliación do período de veda ata catro meses, dous deles subvencionados.

Ribeira engrosa a súa programación cultural con catro novas propostas que se desenvolverán no auditorio ata decembro. Destaca o espectáculo ‘Iconos’ do recoñecido dramaturgo Rafael Álvarez ‘El Brujo’.

Nas comarcas do Barbanza e Muros e Noia rexistráronse un regueiro de incidencias. A maioría delas de pouca consideración. A máis grave, en Porto do Son, onde o forte vento tirou con varias das paredes do polideportivo anexo ó instituto Fraga do Noivo. Motivo que obrigou á suspensión das clases.

O concello da Pobra e SEA exploran novas vías para a ampliación de chan industrial do municipio. A xerente da sociedade estatal mantivo esta mañá unha xuntanza coa xunta directiva da entidade de Conservación do Polígono para estudar as alternativas de terreos dispoñibles.

O alcalde de Rianxo saíu ó paso das críticas formuladas polo Partido Socialista con respecto ó retraso dalgunhas obras. Julián Bustelo aclarou que o abastecemento e saneamento dos  núcleos de Quintáns e Vilas está a piques de rematar. Incidiu en que a demora debeuse ás dificultades orográficas do terreo e non á incapacidade de xestión do goberno.

A corporación municipal de Ribeira debaterá este xoves a aprobación dos orzamentos para o 2024. A proposta do goberno, que ascende a 31’6 millóns de euros, prioriza o reforzo de servizos básicos e a atención ás persoas, sen incrementar os impostos municipais.