BARBANZA

O concello da Pobra celebrará este mes a vixésimo oitava edición das xornadas Valle-Inclán. A programación, que conmemora este ano o centenario de Tirano Banderas, inclúe exposicións, presentacións literarias, representacións teatrais e roteiros divulgativos.

As obras de ampliación da casa da cultura de Boiro poderían estar rematadas a finais de ano. Así llo comunicaron os responsables da obra ó alcalde nunha visita realizada esta mañá á Cachada para comprobar o avance dos traballos.

A designación dos novos candidatos abre un novo escenario político que xa xerou as primeiras reaccións do resto de actores implicados. Nós Pobra esíxelle a José Carlos Vidal a entrega inmediata da acta de concelleiro e a renuncia á alcaldía.

Un ano despois da súa toma de posesión trala moción de censura, a alcaldesa de Ribeira fixo balance da súa xestión. Acompañada do voceiro dos seus socio de goberno repasaron algúns dos proxectos que conseguiron sacar adiante ó longo destes meses así como as políticas desenvolvidas para mellorar a calidade de vida dos ribeirenses.

A novena edición do Festival Mares da Fin do Mundo recalará en Rianxo entre o 14 e o 18 de outubro. No auditorio municipal proxectaranse medio cento de documentais sobre as comunidades pesqueiras e desenvolveranse actividades paralelas durante toda a semana.

Nace ‘Adestrar sen pantallas’. Trátase dunha nova experiencia da Fundación Galega contra o Narcotráfico que busca promover o uso saudable da tecnoloxía entre a mocidade. O obxectivo é previr posibles adicións vinculadas á internet, aos móbiles, ás redes sociais ou ás apostas. O programa vaise desenvolver en tres localidades da nosa contorna: Vilagarcía, Cambados e Ribeira. En cada municipio, a fundación conta coa complicidade de clubes deportivos e dos seus adestradores, encargados de promover dende o deporte un uso máis responsable das novas tecnoloxías.

Tenso pleno o vivido este xoves en Ribeira. A oposición esixiulle ó goberno explicacións sobre o cambio de criterio para emprazar a futura residencia nunha parcela entre Cruxeiras e San Roque, desbotando definitivamente o proxecto das Saíñas. Dende o executivo aclararon que a busca do novo emprazamento realizouse trala modificación da normativa para a construción de edificios públicos en zonas potencialmente inundables.

Congalsa, empresa especializada na elaboración de todo tipo de produtos conxelados a base de peixe e marisco e pratos precociñados, está un ano máis presente en Conxemar, a feira internacional do sector que se celebra estes días no recinto feiral de Ifevi, en Vigo. A firma, con sede na Pobra, acudiu á Conxemar cun espazo propio, duns cen metros cadrados de superficie, para ofrecer as últimas novidades nas súas diferentes marcas propias orientadas ó canal HORECA, a través da súa campaña ‘O mellor está por vir’.

O auditorio de Ribeira acolle ata o 9 de outubro a residencia artística de Píscore Teatro. Os actores ultimarán estes días a posta en escena da súa última montaxe ‘Comed(IA)’ que se estreará o venres no marco da Mostra de Teatro Municipal.

A Deputación presentou a segunda edición do programa MercaNaVila de apoio ó comercio local. O organismo provincial mobilizará nesta campaña uns cinco millóns de euros, con vales de desconto ata 100 euros para poder mercar nos establecementos da provincia con menos de vinte mil habitantes.