BARBANZA

A Garda Civil e a Policía Local da Pobra investigan a autoría dun roubo con forza nunha perruquería da localidade, situada en pleno casco urbano. Os amigos do alleo accederon ó interior do local rompendo o vidro dunha fiestra lateral. Os cacos levaron todo o diñeiro en metálico que atoparon.

Ribeira acollerá o sábado 21 de marzo a Andaina Solidaria Art for Dent. Esta terceira edición, que agarda reunir a 200 participantes, farase en horario vespertino con saída ás seis e media da tarde dende a praza de España e chegada ó miradoiro da Pedra da Rá coincidindo co Solpor.

A lonxa de Ribeira acolleu esta mañá o primeiro dos talleres do Programa Educativo Capitán Mareas. Trátase dunha iniciativa promovida por Vegalsa-Eroski para dar a coñecer a actividade do sector pesqueiro e fomentar o consumo de peixe entre os máis pequenos.

O auditorio de Ribeira acolleu a pasada tarde-noite o acto de presentación da Volta Ciclista á España Feminina 2026. A proba que arrancará o domingo 3 de maio terá a Galicia como gran protagonista.

Os voluntarios ambientais de AMICOS seguirán a traballar na recuperación de especies mariñas trala renovación do convenio coa lonxa Ribeira. Dende o pasado ano teñen montado no recibidor da rula un hospital de corais.

Seguen as concentracións na Pobra para reclamar un Punto de Atención Continuada a tempo completo. Como veñen facendo  cada venres dende outubro pasado, a veciñanza da localidade saíu esta mañá á rúa para demandar unha atención primaria de calidade.

Un total de once millóns de euros. Esta será o investimento inicial que terá o concello de Ribeira para o desenvolvemento do ‘Ribeira Atlántica 2030’, a través da Estratexia de Desenvolvemento Integrado Local, para a que xa se aprobou unha dotación de 6 millóns e medio de euros procedentes de fondos europeos. Boa parte dese total irá destinado á rexeneración do barrio de Bandaurrío.

Ribeira adiantou as celebracións do 8M a este venres cunha homenaxe ás mulleres que son referente no deporte. O acto contou coa presenza de Ana Peleteiro que foi distinguida, xunto con outras moitas ribeirenses, polo seu destacado papel en distintos eidos da práctica deportiva.

Unha docente do CEIP de Abanqueiro foi seleccionada no marco do Proxecto Erasmus Plus Incluídas. María Agrafojo participará a finais do mes de marzo nunha estadía en Francia na que intercambiarán experiencias sobre a educación inclusiva.

O PP levou ó Senado a diminución das posibilidades de pesca da flota española que está a provocar un importante descenso da actividade. O Grupo Popular insta ó goberno central a adoptar medidas para incentivar a remuda xeracional no sector e evitar a súa progresiva desaparición.