BARBANZA

O BNG de Ribeira propón investir 1’7 millóns de euros nas parroquias. A proposta presentada polos nacionalistas iría con cargo ó Plan de Obras e Servizos da Deputación da Coruña para este ano 2026. As actuacións, que foron recollidas da propia veciñanza, daríalle prioridade ós servizos básicos.

O concello de Ribeira traballa na mellora do sistema de recollida selectiva do lixo. Ademais das numerosas campañas informativas que están en marcha, incrementouse o control sobre o depósito de residuos na vía pública, infracción pola que xa se teñen tramitado as primeiras multas.

A delegada da Xunta na Coruña, Belén do Campo, comprobou esta mañá os traballos de renovación do firme levados a cabo en varias vías do parque empresarial da Tomada con fondos a unha subvención da consellería de Economía e Industria. A actuación, cun orzamento duns 110 mil euros, permitiu mellorar o estado da vía e as condicións de seguridade.

O executivo rianxeiro vén de sacar estes días a licitación as obras de ampliación das redes de abastecemento e saneamento en Villanustre, na parroquia de Asados, e a ampliación da rede de abastecemento de auga entre Corques e Outeiro, en Taragoña. Estas tres actuacións súmanse a outras obras xa adxudicadas a finais do ano pasado, que suman no seu total  uns 800 mil euros de investimento.

A alcaldesa de Ribeira convocará a próxima semana a xunta local de seguridade para abordar o incremento de roubos no municipio. Tamén mantivo encontros coas asociacións de hostaleiros e empresarios para analizar as medidas que están a adoptar en colaboración cos corpos policiais.

O Pazo de Goiáns acollerá entre o 28 de febreiro e o 1 de marzo a decimo novena edición do Encontro Arqueolóxico do Barbanza. Abordaranse investigacións tan destacadas como os últimos achados da Sima dos Osos na serra de Atapuerca.

Mañá xoves, a corporación municipal de Rianxo celebra o pleno ordinario correspondente a este mes de xaneiro. Na orde do día figuran un feixe de puntos, entre os que se atopa a aprobación das obras incluídas no Plan de Obras e Servizos da Deputación da Coruña para este 2026.  Segundo o equipo de goberno trátase de proxectos para seguir avanzando na mellora de accesos a núcleos e na ampliación dos servizos de auga e saneamento nas parroquias.

O concello de Boiro e a asociación AMBAR asinaron esta mañá un convenio para a cesión dun edificio en Praia Xardín. A entidade habilitará no inmoble seis vivendas sociais con distintos usos que buscan promover a autonomía das persoas con diversidade funcional.

Ribeira inicia o camiño para que o legado de Manuel Ayaso permaneza no concello. A corporación municipal aprobou por unanimidade a aceptación da doazón das súas obras co compromiso de abrir unha sala para a súa exhibición nun prazo máximo de cinco anos.

O concello de Ribeira está a desenvolver unha campaña divulgativa sobre o uso do contedor marrón. Durante a xornada de hoxe martes, estivo instalada unha mesa informativa na rúa de Galicia onde ademais os cidadáns puideron recoller as chaves para a apertura destes colectores.