BARBANZA

O Lab Barbanza acolleu a xornada Agro 360 sobre o sector agroalimentario galego. Destacados expertos e profesionais analizaron cuestións que afectan a un dos principais sectores produtivos de toda Galicia como os novos marcos legais ou a necesidade de adaptación ó cambio climático.

O concello de Boiro desenvolver ó longo da segunda quincena de novembro unha campaña especial de control de mascotas. Esta iniciativa, de carácter informativo, incidirá na necesidade de levar ós animais con correa e identificados con microchip así como na obriga de recoller os seus excrementos.

Preocupación polo avance imparable da toxina en todas as Rías Baixas. Nestes momentos as rías de Pontevedra e Muros-Noia atópanse totalmente clausuradas, así como boa parte da de Arousa. En concreto, están pechados 41 dos 52 polígonos das rías.

A Xunta de Galicia investirá máis dun millón de euros na rehabilitación integral do CEIP Praia Xardín en Boiro. Esta actuación enmárcase no paquete de melloras en centros educativos que acometerá a administración autonómica nos primeiros meses de 2026, no que tamén figura un investimento para a reconstrución da pista deportiva do IES Porto do Son.

Portos de Galicia procederá ó repintado das prazas de estacionamento do recheo de Ribeira. Na actualidade, todas están pintadas de verde o que levou a confusión ós usuarios posto que tan só están reservadas para profesionais as máis próximas ós pantaláns.

O PP consegue aprobar na Comisión de Pesca no senado, unha moción coa que esixe ó Goberno central un liderado claro e firme na defensa dos intereses estratéxicos do sector pesqueiro. O senador Manuel Ruíz aludiu ó progresivo deterioro dos intereses do sector, en clara referencia ás últimas decisións tomadas no seo da Unión Europea.

O concello de Ribeira vén de reactivar o expediente para a compra da antiga nave de Cerqueira. A pesar de que o anterior goberno anunciara a súa inminente adquisición, o expediente carecía de varios informes e non contaba co acordo plenario para aprobar a operación que ascendía a medio millón de euros.

A mes e medio das festas de Nadal, as prazas da comarca comezan a experimentar un repunte nas vendas de peixe e marisco. Os máis previsores xa comezaron a adquirir produto para conxelar co fin de evitar as bruscas subidas que se agardan nas datas previas ós festivos.

O Centro de Recollida de Animais da Pobra conta cun novo módulo dotado con seis gateiras. A ampliación das instalacións, xestionadas pola protectora Moura, foi posible grazas ó Fondo de Compensación Ambiental da Xunta de Galicia.

O BNG do Barbanza presentará emendas ós orzamentos da Xunta na comarca por valor de 38 millóns de euros. Entre as partidas máis destacadas que botan en falta, sinalan as destinadas á creación de chan industrial, saneamento da ría e servizos sociais tan necesarios como centros de día, residencias e escolas infantís.