BARBANZA

O presidente da Xunta asistiu esta mañá en Rianxo ó acto simbólico de colocación da primeira pedra  na nova planta de Stolt Sea Farm, no polígono de Té. Alí reivindicou o liderado da nosa comunidade no sector da acuicultura, apostando ademais por atraer novos investimentos a Galicia.

O concello de Ribeira e o Club Natutral Sport asinaron un convenio para dotar de equipamento ó módulo de deportes de contacto da Fieteira. A entidade deportiva asumirá o 70 por cento do investimento mentres que o concello achegará 36 mil euros para financiar parte do material.

A Asociación das Amas de Casa de Ribeira volverá homenaxear ás vítimas da Covid-19. Será este sábado ás seis e media na Praza de España cun acto sinxelo no que se realizará unha ofrenda ante o monumento na súa lembranza e un minuto de silencio.

A corporación ribeirense celebrou onte pola noite o seu pleno de organización. O grupo  de goberno, formado polos 10 edís do PP e os 3 do PBBI, en maioría, logrou sacar adiante a súa proposta de novo goberno que inclúe un total de cinco dedicacións exclusivas e dúas parciais. O novo executivo defendeu a súa proposta, que suporá un aforro dun 13% menos con respecto ó anterior goberno.

A quinta andaina solidaria de Jealsa logrou superar os seis mil euros de recadación. Esta mañá tiña lugar no concello de Boiro o acto simbólico de entrega do cheque á Fundación Stop Leucemia. Os fondos irán destinados ó Grupo de investigación en Hematoloxía Computacional e Xenómica do Hospital Clínico de Santiago.

O executivo ribeirense segue a dar pasos, esta vez a través da Federación Galega de Municipios e Provincias, de cara ó traspaso ó Sergas da xestión da Unidade de Condutas Aditivas. Dende o Concello aluden a que o cambio do modelo de xerencia, que se fará efectivo o 1 de xaneiro, será beneficioso para todos.

O PSOE de Rianxo insta a Augas de Galicia a asumir a xestión integral da EDAR e do tanque de tormentas. No seu defecto, apostan por activar a licitación do servizo que custa máis de 25 mil euros ó mes ás arcas municipais.

O Hospital do Barbanza contará a partir do ano que vén cunha ambulancia medicalizada. A Consellería de Sanidade destinará unha partida de 460 mil euros para poñer en marcha este servizo. O Conselleiro de Sanidade anunciou tamén a creación  dun hospital de día oncohematolóxico que podería estar operativo en 2027.

Os alumnos de 3ºB do CEIP O Grupo de Ribeira comezaron a semana cun novo titor. A incorporación deste mestre foi posible grazas á presión da comunidade educativa que secundou as mobilizacións da ANPA para contar cun docente a tempo completo nesta unidade.

O concello de Ribeira presentou 5 propostas alternativas para o emprazamento da futura residencia. A Consellería de Política Social reservará unha partida dun millón de euros nos próximos orzamentos para iniciar o procedemento que permita dotar ó municipio dun servizo tan necesario.