Noia

A Peña Ciclista Toxo organiza este vindeiro domingo 6 de xullo a segunda edición da Mini BTT Ría de Noia. Na proba agárdase unha participación próxima ós 300 nenos.

O BNG reclama á Xunta o mantemento do reforzo médico no PAC de Noia. Os recortes no servizo supuxeron que este profesional tan só preste servizo os domingos e festivos, en horario de dez da mañá a tres da tarde e non de oito a dez, como facía antes da pandemia.

Un ano máis e a xa van cinco edicións, a academia de Baile Kitis Katis de Noia organiza o seu festival benéfico. Será o vindeiro 6 de xullo, ás sete da tarde, na Sociedade Liceo. Tódolos fondos recadados destinarase neste caso á obra social de Pediatría do Hospital Clínico de Santiago.

O Conservatorio de Noia pecha o Xuño Musical cunha actividade do máis innovadora. Máis de 60 músicos ofrecerán un concerto dende os balcóns do Casino poñendo así o mellor broche de ouro ó presente curso.

A confraría de Noia intensifica estes días os traballos nos seus bancos marisqueiros para que estean nas mellores condicións para o inicio da vindeira campaña, a finais do mes de setembro. Nas últimas semanas sementáronse máis de dous millóns de unidades de molusco, a maioría delas de ameixa, procedentes do seu criadeiro do Freixo.

O BNG insta á Xunta a promover instalacións dedicadas á semente de bivalvo de cara a favorecer a recuperación do marisqueo. Os deputados nacionalistas, Rosana Pérez e Óscar Ínsua, visitaron esta mañá o criadeiro que a confraría de Noia ten no Freixo para coñecer o proceso de produción.

A residencia da terceira idade de Ribeira non é o único proxecto afectado polo cambio de normativa que impide construír instalacións públicas en zonas potencialmente inundables. No caso do centro de día da Chaínza en Noia, o concello está a realizar as consultas oportunas para determinar a viabilidade do proxecto.

O concello de Noia inviste 230 mil euros na mellora da rúa de Vistafermosa ó cruceiro de Barro. Ademais da nova pavimentación e mellora da accesibilidade procederase á renovación das canalizacións de auga e saneamento.

Os concellos da Mancomunidade Serra do Barbanza seguen a traballar na busca dunha solución alternativa que garanta a continuidade da planta de Servia. Na próxima reunión da xunta directiva abordarase os futuros usos da instalación que poderían pasar pola xestión de residuos da construción ou dos puntos limpos.

Noia acollerá a decimo segunda edición do Noia Harp Fest entre o 30 de xullo e o 2 de agosto. O festival contará con destacados representantes da música folk a nivel internacional como Rebeca Hill ou Kevin Le Pennec.