CALDAS

Unha vintena de proxectos recibirán axudas a través do Grupo de Desenvolvemento Rural Salnés-Ulla-Umia na convocatoria 2025-2026. A entidade celebrou onte a súa asemblea xeral, na que se informou das propostas de aprobación destas achegas. Así, estas iniciativas recibirán axudas de 430.000 euros, mobilizando un investimento total de 1,2 millóns. Na listaxe hai proxectos de concellos, de entidades sociais e culturais e de emprendedores, con propostas innovadoras como a creación dunha biorrefinería ou dun crematorio para mascotas.

Hoxe rematou a primeira edición do obradoiro de emprego xuvenil que organizaron de forma conxunta os concellos de Moraña, Valga e Portas. Unha iniciativa que permitiu formar a 16 mozos e mozas nos módulos de albanelería e forestal durante un ano. Grazas á parte práctica, durante este tempo levaron a cabo diversas melloras e actuacións nos tres municipios.

Valga segue avanzando para facer realidade o seu proxecto de rexeneración da lagoa de Porto Piñeiro. Xa están en marcha os traballos de construción da piscina, que contan cun orzamento de algo máis de 900.000 euros. Os cartos proceden de fondos da Deputación de Pontevedra: do Plan Extra e do Plan Máis Provincia. Hoxe celebrouse o levantamento da acta de replanteo da actuación.

Os veciños afectados pola Variante Oeste de Caldas, esperanzados en que haxa cambios no proxecto definitivo. As plataformas veciñais mantiveron unha reunión na Delegación do Goberno en Galicia co delegado e con representantes da Demarcación de Estradas. Unha entrevista que aproveitaron, xunto co alcalde caldense, para poñer sobre a mesa o impacto social do actual proxecto. Agora traballarán para consensuar unha nova proposta. Polo de momento, manterán as mobilizacións.

E que opina ao respecto a clase política? En Caldas e sobre o proxecto da Variante Oeste todos os partidos con representación no pleno municipal van a unha. Súmanse aos veciños á hora de rexeitar un proxecto que, tal e como está presentado na actualidade, consideran lesivo para a localidade.

O concello de Catoira precinta a pirotecnia ilegal de Coaxe. No almacén, situado na parroquia de Dimo, xa non queda ningún tipo de material explosivo. Constatouno esta mañá a Garda Civil. Os veciños celebran a noticia, logo de varios anos loitando contra a instalación deste almacén. Agora piden que se execute a súa orde de derribo.

O goberno provincial mobilizará 128 millóns de euros para os concellos de menos de 50.000 habitantes. Avanzouno hoxe o presidente nun acto cos alcaldes e alcaldesas da provincia. Salienta a cifra récord do Plan +Provincia, que acada os 50 millóns de euros. Ademais, como novidade, os concellos poderán ter acceso anticipado as 35 millóns de euros do +Provincia do ano 2027 para proxectos plurianuais. Haberá tamén unha nova edición do Plan Extraordinario de Infraestruturas Deportivas con 8 millóns de euros e o segundo Plan Extra estará dotado no 2026 con 35 millóns de euros.

Caldas de Reis rexeita as propostas para a Variante Oeste presentadas polo Goberno central. O executivo local non entende por que non se ten en conta a opción que defende a corporación de xeito unánime dende o ano 2008. O principal foco de polémica é a conexión da variante co Porto de Vilagarcía. Nunca foi demandada polo municipio e suporía a demolición de varias vivendas e a división das parroquias afectadas polo trazado. Agora o rexedor solicita unha reunión co Ministerio de Transportes para propoñer melloras a este estudo.

A veciñanza de Carracedo, en Caldas, reclama dous pasos de peóns para a concorrida N-550, que atravesa a parroquia. Denuncian que tanto eles como os milleiros de peregrinos que fan o Camiño Portugués vense obrigados a atravesar a estrada a diario poñendo en perigo a súa seguridade. Acaban de iniciar unha campaña de recollida de sinaturas para reclamar ao Ministerio de Transportes que atenda dunha vez esta vella reivindicación.

A Garda Civil confirma que a identidade dos dous corpos atopados completamente calcinados en Campo Lameiro son os da parella de Moraña que levaba días desaparecida. Agora, continúa a investigación para esclarecer as causas exactas, pero todo apunta a que se trata dun caso de violencia de xénero.