Salnés - Caldas

Meis ten todo listo para as súas festas do San Bieito. Guadi Galego será un dos pratos fortes da proposta musical, xunto con orquestras como Os Satélites ou a Marbella. Na parte gastronómica, os callos serán un ano máis os protagonistas absolutos destes festexos, coa XXXII edición da súa festa o 14 de xullo. Ademais, haberá distintas actividades paralelas, como o torneo interparroquial de fútbol ou a xa clásica BTT dos callos.

A sexta edición do Solifesti deixa moi bo sabor de boca en Meis. Ducias de persoas achegáronse ata este festival solidario que impulsa o CPI do Mosteiro. Este ano todo o recadado foi para a Asociación Española contra o Cancro e o propio bando de alimentos da localidade.

O futuro da Mancomunidade do Salnés, no aire. O PP trata de recompoñer o organismo logo do pleno do pasado venres. O presidente comarcal, David Castro, acabou retirando da orde do día a proposta de orzamentos e os nomeamentos de José Aspérez como delegado de turismo, cun soldo que acabaría roldando os 35.000 euros; e de Sabela Fole como vicepresidenta. PSOE, BNG e Esquerda Unida fixeron fronte común denunciando que o PP está a rachar co consenso que sempre caracterizou á Mancomunidade.

> A ausencia dos dous representantes do PP de Meaño no pleno da Mancomunidade, obriga o seu presidente, o popular David Castro a retirar da orde do día os puntos máis controvertidos.

A comunidade educativa do colexio As Covas, en Meaño, está farta do lamentable estado no que se atopan os baños. Piden de novo a Educación a que tome medidas e reforme os aseos canto antes, unha petición que veñen arrastrando dende hai anos. As condicións dos baños son tan malas que as familias aseguran que hai nenos e nenas que agardan a chegar á casa para facer as súas necesidades. Non descartan seguir facendo presión para que se atenda a súa petición, recorrendo a tódalas vías precisas.

O primeiro ximnasio ao aire libre de Galicia está en Vilagarcía. Trátase dun espazo de 400 metros cadrados con máquinas de todo tipo para diferentes exercicios. Detrás desta iniciativa está a empresa Evofit, que dende hai xa sete anos ofrece os seus servizos no Centro Comercial Arousa.

VILAGARCÍA> Centos de embarcacións arroupan ao Artic Sunrise de Greenpeace na súa chegada á ría de Arousa. Trátase dunha mobilización histórica coa que ecoloxistas...

A reforma do pavillón de Fontecarmoa, en Vilagarcía, encaran a súa recta final. As obras superaron xa a súa fase máis complexa, co cambio de cuberta e a reparación da estrutura. Nestes momentos 30 operarios traballan no acondicionamento do interior, que inclúe tamén a reforma dos vestiarios e o ximnasio. Malia os contratempos e os retrasos acumulados, calculan que os traballos estarán rematados no vindeiro mes de xullo.

Ribadumia conta dende hoxe cunha biblioteca diversa. Trátase dun espazocon diferentes títulos que teñen como nexo común a temática LGTBIQ+. A colección xa está dispoñible na Casa da Cultura de Ribadumia, onde esta mañá a Asociación Gotas organizou tamén un contacontos diverso para a rapazada. O obxectivo, normalizar entre os nenos e nenas os dinstintos modelos de familia, inculcándolle valores como o respecto e a tolerancia.

Cambados estará os días 28 e 29 deste mes máis á beira do mar que nunca. O barrio de Santo Tomé acollerá a Festa Mariñeira, un encontro co que se busca recuperar e poñer en valor a cultura mariñeira na vila. Haberá varias rutas, a proxeccion dun documental, citas gastronómicas, música e un encontro de embarcacións tradicionais. A festa servirá tamén para recadar fondos a prol da rehabilitación da emblemática embarcación cambadesa Airexa.