Cambados

Cambados xa conta os días para a súa semana grande. A septuaxésimo segunda edición da Festa do Albariño comezará o vindeiro 31 de xullo, garantindo cinco días de gran ambiente, ampla programación e dos mellores viños na vila cambadesa. Haberá stands das adegas no Paseo da Calzada, o Túnel do Viño no Salón Peña, os concertos na Praza de Fefiñáns e o Xantar de Confraternidade no Pazo Torrado, entre outras citas que non poden perder.

A voceira do Partido Popular de Cambados, Sabela Fole, xa é a vicepresidenta da Mancomunidade do Salnés. Fíxoo o PP en solitario, cos votos en contra de PSOE, BNG e Esquerda Unida. Fole entrará así na comisión executiva, igualando as forzas dos socialistas e dos populares, tendo en conta que estes teñen do seu lado o voto de calidade do presidente David Castro.

Dous fuxitivos da zona das Rías Baixas, entre os dez prófugos máis buscados pola Policía Nacional. Un deles é Baltasar Vilar Durán. Coñecido como Saro, está condenado a 45 anos de cadea por delitos de tráfico de drogas. O outro é Segundo Cousido Vieites. De 42 anos e natural de Vigo, foi condenado a unha pena de 32 anos de cadea por abusar de menores de idade nun campamento organizado por un colexio de Cambados.

A asociación Xironsa de Cambados recupera este ano o seu festival, logo de ter que cancelalo o ano pasado por falta de apoios económicos. A cita será o vindeiro sábado 6 de xullo, cunha proposta que recolle actuacións pensadas para todas as idades.

O futuro da Mancomunidade do Salnés, no aire. O PP trata de recompoñer o organismo logo do pleno do pasado venres. O presidente comarcal, David Castro, acabou retirando da orde do día a proposta de orzamentos e os nomeamentos de José Aspérez como delegado de turismo, cun soldo que acabaría roldando os 35.000 euros; e de Sabela Fole como vicepresidenta. PSOE, BNG e Esquerda Unida fixeron fronte común denunciando que o PP está a rachar co consenso que sempre caracterizou á Mancomunidade.

Cambados estará os días 28 e 29 deste mes máis á beira do mar que nunca. O barrio de Santo Tomé acollerá a Festa Mariñeira, un encontro co que se busca recuperar e poñer en valor a cultura mariñeira na vila. Haberá varias rutas, a proxeccion dun documental, citas gastronómicas, música e un encontro de embarcacións tradicionais. A festa servirá tamén para recadar fondos a prol da rehabilitación da emblemática embarcación cambadesa Airexa.

O novo presidente da Mancomunidade do Salnés convoca o seu primeiro pleno ordinario para o venres da semana que vén. Malia ter tomado posesión no mes de xaneiro, e as sesións ordinarias ter que celebrarse cada dous meses, ata o de agora aínda non se fixera ningunha. O anuncio desta convocatoria produciuse esta mañá, apenas unha hora despois de que o PSOE anunciase que ían presentar por rexistro unha solicitude de convocatoria. Os socialistas denuncian que o PP ten 'secuestrado' o organismo comarcal. Advirten, ademais, de que está ao borde da fractura.

O PSOE critica os retrasos que está sufrindo a recontrución da ponte nova de Pontearnelas. Denuncian a falta de compromiso da Xunta coa comarca e din que unha mostra máis é como se xestionou o arranxo desta infraestrutura. Lembran que a súa posta en uso estaba prevista para finais do ano pasado e que xa no mes de xuño, aínda está pendente de rematar. Advirten ademais dos danos que esta situación está a provocar na ponte dos Padriños, por onde se está a desviar o tráfico.

A adega Martín Códax é estes días sede do Foro Mundial de Cooperativas Vitivinícolas. Trátase do evento máis importante a nivel mundical para o sectore vitivinícola. Un espazo no que se debate arredor do modelo económico, social e colaborativo das cooperativas.

Os concellos de Cambados e Ribadumia únense pola quinta edición do torneo de ximnasia rítima que organiza o Club Grand Jeté. A cita vai ser no pavillón municipal da Senra, en Ribadumia, este vindeiro sábado. Alí daranse cita unhas 250 participantes chegadas de diferentes puntos de Galicia.