Cambados

Hoxe anunciáronse obras importantes para dous centros educativos do Salnés. En Cambados, hoxe sae a licitación a ampliación do San Tomé por preto dun millón de euros. A intervención inclúe a recuperación dun espazo do faiado no que se albergarán dúas novas aulas, unha biblioteca con sala de radio e dúas aulas de desdobre.En Ribadumia, entra tanto, adxudicouse este venres a substitución das cubertas do Julia Becerra Malvar, para a que se destinarán 240.000 euros.

Cambados foi beneficiario de varias axudas da Xunta para a área de Cultura. Ademais dunha achega de 4.000 euros para o fomento da lectura, recibiu outra subvención que permitiu ao goberno local o cambio de ventás na biblioteca de Corvillón. Esta mañá achegouse ao municipio o delegado da Xunta en Pontevedra. Coincidindo coa súa visita o Concelleiro de Cultura pediulle que traslade á Xunta a necesidade de baleirar aos concellos de competencias impropias.

Na ponte das Letras Galegas chega unha nova edición da Primavera de Portas Abertas da Ruta do Viño Rías Baixas. Nesta cita van participar 22 adegas do Salnés, con xornadas de portas abertas de balde. A proposta complétase con máis dunha ducia de actividades, co viño mesturándose coa paisaxe, o patrimonio ou a gastronomía.

Normalidade nas comarcas de Pontevedra, O Salnés e Caldas logo do gran apagón deste luns que deixou ás escuras a Península Ibérica. Na maioría de municipios desta zona o subministro eléctrico volvía de madrugada.En zonas da cidade de Pontevedra sobre a 1, na Illa ou Vilagarcía sobre as 4, en Poio case ás 5 ou en Cambados case ás 6. Noutros concellos, como no de Sanxenxo ou O Grove, a luz non regresaba ata as 8 e media desta mañá. Durante a noite, nos municipios reforzouse a presenza policial e dos efectivos de emerxencia para garantir a seguridade da poboación.

Xa se pode visitar en Cambados a mostra Saudarte. Alumando cambadés e vilagarcián participa nesta iniciativa de Fundación Galega contra o Narcotráfico. Unha actividade que busca fomentar a creatividade entre a rapazada a través da arte. Un xeito de promover os hábitos saudables e previr a drogodependencia entre os máis novos.

A decisión do presidente estadounidense Donald Trump de impoñer aranceis ás importacións afecta de cheo ao sector vitivinícola. Así as cousas, dende as principais cooperativas da Denominación de Orixe Rías Baixas analizan a situación con prudencia. Confían en que o bo posicionamento dos seus viños axude a capear o temporal, sobre todo nestes momentos de maior incerteza. Polo de momento, non saben como lles van a afectar estes novos aranceis xa que pecharon boa parte das vendas a Estados Unidos antes do conflito.

BNG e Partido Socialista reclaman á Xunta que tome medidas de apoio ao sector vitivinícola fronte á guerra comercial aberta por Estados Unidos. Esta mañá, tanto Ana Pontón como Xosé Ramón Gómez Besteiro deixáronse ver pola comarca do Salnés. A voceira nacionalista mantivo un encontro cos representantes das cooperativas da zona para coñecer de primeira man a súa situación. O líder socialista, pola súa banda, visitou as instalacións da cooperativa cambadesa Martín Códax.

Ás portas da Semana Santa, Martín Códax lanza a súa proposta enoturística para esta primavera. A adega reforza a súa oferta, con actividades pensadas para públicos amplos, autóctonos e visitantes. Inclúe visitas guiadas con catas de viños e produtos galegos e un paquete de experiencias nas que se vincula a viticultura coa tradición mariñeira.

Os viticultores da denominación de orixe Rías Baixas están estes días moi pendentes do mildio, pola propagación de esperos que poden afectar ás vides. Os expertos recomendan incrementar a vixilancia nos viñedos. Máis aínda, tendo en conta que as chuvias previstas para a fin de semana poderían favoreceron a súa propagación.

Hoxe conmemórase o Día Mundial da Concienciación sobre o Autismo. Aproveitamos esta xornada para visitar as novas instalacións de Bata en Cambados. Trátase dun baixo de titularidade municipal cedido á entidade, onde xa desenvolve o seu traballo. Na vila, como noutros puntos da nosa contorna, aproveitouse esta xornada para ler manifestos a prol da visibilidade deste trastorno e a inclusión das persoas que o padecen.