Meaño

Alberto Núñez Feijóo traslada o seu apoio ao sector do viño de Rías Baixas. O presidente do PP visitou a adega Paco&Lola en Meaño. Alí, cualificou de 'inmenso erro' a política arancelaria de Trump e defendeu un 'alivio fiscal' para as adegas que se poidan ver afectadas se finalmente o presidente dos Estados Unidos cumpre coas súas ameazas.

En Meaño están decididos a que a romaría de San Bieito de Palermo de Cobas, máis coñecido como 'O Negro', volva gozar do esplendor que tiña no pasado. Un grupo de veciños quere recuperar esta festividade relixiosa, na que antes participaban milleiros de romeiros. A cita vai ser o Martes de Pascua, o vindeiro día 22, con programación relixiosa e festiva durante toda a xornada. A veciñanza fai un chamamento a participar no San Bieito 'O Negro' como un xeito de manter vivas as nosas tradicións e identidade.

Máis dun cento de persoas traballan xa para darlle forma á Semana Santa de Paradela. Este ano, os actos relixiosos veñen con novidades. Por unha banda, coa recuperación da Confraría de Santa María, que levaba inactiva máis dunha década. Pola outra, pola 'unificación' dos actos relixiosos de Xoves e Venres Santo en Paradela de sete parroquias distintas de Meis, Ribadumia, Portas e Meaño. Trátase dun evento declarado de interese turístico galego e que aspira a converterse de interese turístico nacional.

Meaño estrea novo camión do lixo. Trátase dunha nova máquina compactadora con dous compartimentos, o que permitirá facer a recollida do colector verde e do marrón a un tempo. Foi adquirido por máis de 330.000 euros, grazas a unha subvención da Deputación de Pontevedra. No marco desa mesma achega o concello tamén adquiriu uns 140 contedores marróns que se van comezar a repartir entre os establecementos hostaleiros a partir de Semana Santa.

Naceu de xeito espontáneo hai catro anos e agora queren que se converta en toda unha tradición. Son os Espantallos de Entroido de Meaño, unha iniciativa que impulsa a Asociación de Veciños Santa Lucía. Doce propostas do máis variado compiten este ano por facerse con algún dos premios, que se van desvelar nun acto en Dena este vindeiro domingo. Os seus credores botaron man de maña, pero sobre todo de moita retranca e moito humor.

Meaño estrea a iluminación no Polígono da Pedreira. A actuación beneficia a un treito de rúa duns 400 metros que ata o momento carecía de alumeado. A dotación deste servizo contou cunha achega da Xunta, grazas a un programa da Consellería de Industria. O goberno galego achegou o 80% do investimento que aquí se fixo, que ascendeu en total a 48.000 euros.

A Mancomunidade do Salnés amosou en Fitur outra forma de facer o camiño. O organismo comarcal quere adiantarse ás necesidades dos visitantes, buscando cativar aos peregrinos de alto poder adquisitivo que optan por paradores ou hoteis para descansar no canto de albergues. Un perfil de visitante que busca experiencias novas, vinculadas a un turismo de calidade.

Aproveitando a celebración de Fitur, representantes da Mancomunidade e todos os alcaldes do xeodestino do Salnés asistiron a un encontro con empresariado da China en España. O organismo comarcal leva tempo traballando para fortalecer os lazos de cooperación coas principais organizacións empresariais do xigante asiático. En xogo, ademais de alianzas turísticas, novas relacións económicas en sectores comerciais estratéxicos, como o vitivinícola ou o da conserva.

A Mancomunidade presenta en Madrid Salnés Slow Business. Trátase dunha nova proposta turística que ofrece a oportunidade de combinar traballo e lecer. Máis de 80 negocios e empresas forman parte xa desta iniciativa dirixida a empresarios, altos executivos ou nómadas dixitais que precisan un descanso pero non poden desatender as súas responsabilidades laborais.

A Deputación de Pontevedra reformará a estrada que conecta Xil, Covas e Barrantes, entre os concellos de Meaño e Ribadumia. O organismo provincial investirá máis de 1,2 millóns de euros para a mellora da seguridade nesta vía. A actuación afectará a un treito de cinco quilómetros e medio. A previsión é que a obra comece neste semestre para que estea rematada a finais de 2025.