SALNÉS

O concello de Vilagarcía acaba de ampliar unha das dúas illas de compostaxe no barrio do Piñeiriño ante a alta implicación da veciñanza. Ademais, esta fin de semana, coincidindo co Solifest, a Asociación Breogán promoverá entre o público que depositen os refugallos orgánicos que se xeren no festival nestes colectores.

Xa se pode visitar na Sala Rivas Briones de Vilagarcía 'A Galicia inédita'. A mostra, impulsada pola Asociación de Xornalistas de Galicia, foi inaugurada este mediodía. A exposición recolle unha escolma de máis de 70 imaxes captadas por fotoxornalistas da prensa galega, entre eles, varios da zona de Arousa e Pontevedra.

Concentración na Illa de Arousa contra a reordenación do tráfico no centro urbano. Ducias de particulares, comerciantes e hostaleiros participaron esta mañá nunha protesta en contra da implantación das medidas que afectarán, especialmente, aos non residentes. Acusan ao alcalde de falta de diálogo e de ter elaborado este plan sen escoitar as súas inquedanzas. Unhas normas que moitos non ven mal, pero cren que se deberían ter implantado despois de habilitar zonas de estacionamento.

Nas zonas residencias de uso restrinxido da Illa xa están instalados os sinais e os lectores de matrícula que, ata mediados de xuño, non van multar. O alcalde defende esta reordenación do tráfico, argumentando que leva anos escoitando a veciños desa zona queixarse do colapso que viven esas rúas. Luís Arosa asegura que está a escoitar todas as demandas dos veciños e comerciantes. Insiste en que o plan está vivo e aberto a cambios. Avanza ademais que están a traballar na creación dun aparcadoiro de 300 prazas preto do instituto.

Primeira das catro xornadas de folga das traballadoras da residencia DomusVi de Ribadumia. Protestan, unha vez máis, polos baixos salarios e as súas malas condicións laborais. Aseguran que non se están cumprindo os hoarios ou os descansos. Unha situación insostible, cunha gran carga de traballo que, lamentan, está repercutindo na calidade asistencial aos residentes.

O barrio do Piñeiriño, en Vilagarcía, pon en marcha a segunda edición do Solifest. Trátase dunha iniciativa impulsada pola asociación de veciños a favor da Amencer-Aspace, que ten a sede neste barrio. A cita vai ser este domingo, cun completísimo cartel que animará a rúa Camilo José Cela dende o mediodía. Na organización agardan superar o éxito do ano pasado, tanto de público como de recadación solidaria.

Vilanova volve aos 80. O municipio prepárase para O Son de Vilanova Fest. O evento vaise celebrar o 12 de xullo, cunha ampla escolma musical dos anos 80. La Guardia é o cabeza de cartel dun festival no que tamén participarán Los Limones, La Década Prodigiosa ou Zapato Veloz.

Un grupo de xubilados do Salnés crea a asociación Sabia Vella. O colectivo nace coa intención de promover a primeira residencia de maiores da comarca en réxime de cooperativa. Un modelo, explican, que funciona xa noutros puntos do Estado. Xa están a estudar a compra dun hotel para transformalo neste novo centro. Fan un chamamento ás administracións para conseguir que este proxecto se faga realidade.

Ás portas da Semana Santa, Martín Códax lanza a súa proposta enoturística para esta primavera. A adega reforza a súa oferta, con actividades pensadas para públicos amplos, autóctonos e visitantes. Inclúe visitas guiadas con catas de viños e produtos galegos e un paquete de experiencias nas que se vincula a viticultura coa tradición mariñeira.

A Illa de Arousa aplicará restricións no tráfico nas rúas do casco máis urbano do municipio. Serán un total de 45 rúas e unha superficie de máis de 200 mil metros cadrados pola que só poderán circular os residentes no concello ou as persoas que teñan un permiso especial. A medida comezará a implantarse o vindeiro luns e estará totalmente operativa a partires do 15 de xuño.