SALNÉS

As principais innovacións do sector vitivinícola danse cita estes días en Vilagarcía na feira Vintec. As novas tecnoloxías póñense ao servizo das adegas na procura dunha maior eficiencia e sostibilidade. Entre os máis de 150 expositores que compoñen o salón podemos atopar incluso novas ferramentas con intelixencia artificial ou incluso un sistema que permite protexer os viñedos das sarabiadas.

Este mércores abriu en Vilagarcía Vintec, o primeiro salón de maquinaria e equipamento para o sector vitivinícola de Galicia. A feira abarca todos os servizos precisos para a produción, recolección, elaboración e distribución do viño. No recinto de Fexdega danse cita ata este venres máis de 150 expositores coas principais novidades para o sector, poñendo o foco na innovación e na sostibilidade.

Os  viñedos de Rías Baixas agardan a chegada do frío. Moitos viticultores comezaron xa a campaña de podas, aínda que case non comezou a caída da folla. Os expertos recomendan agardar un chisco máis para facer estes traballos. A falta de tempo outonal leva a moitos pequenos viticultores a tomar a decisión de iniciar xa estas tarefas para que non se lles bote o tempo enriba.

Meis despide unha completa edición de Meusviños. As xornadas de autopromoción vitivinícola do municipio volveron contar co apoio do público, que encheu a feira durante esta fin de semana. 15 adegas asentadas no concello participaron neste sétima edición, na que tampouco faltaron outras actividades arredor do viño e a gastronomía.

A praza de abastos de Vilagarcía acolle entre este luns e martes un obradoiro de batchcooking, dito doutro xeito, preparar varios menús dunha atacada para varios días para aforrar tempo na cociña. Pero o obxectivo desta iniciativa vai máis alá, porque o que pretende é incorporar á nosa dieta máis peixe, achegando ao público receitas e técnicas sinxelas para que non se perda nin o seu sabor nin ningunha das súas propiedades.

Sanxenxo acolle entre este xoves e venres un Congreso Internacional de Pesca e Turismo. Organizado polos Grupos de Acción Local do sector Pesqueiro, o foro aborda cuestións clave como o turismo mariñeiro sostible, a diversificación da pesca artesanal e a valorización dos produtos do mar. No encontro, inaugurado pola conselleira do Mar, están a participar diversos expertos nacionais e internacionais.

Cambados contará este ano por defuntos con dous mercados de flores. O concello cedeu á Asociación de Floristas do municipio a organización deste evento, que pasa de Fefiñáns á contorna da praza de Abastos con só oito postos. Unha decisión que deixa fóra unha vintena de vendedoras, que viñan participando nesta cita. A Asociación de Floristas considera que eses postos son un claro caso de intrusismo laboral. Pero as vendedoras deféndense amparándose na normativa, apuntando que teñen dereito a participar. Tomaron a decisión de montar un mercado propio nunha nave de Castrelo, anunciando prezos máis competitivos.

Cambados reforza o cadro de persoal da Policía Local. Este luns incorporáronse ao corpo dous novos axentes. Os dous estiveron este verán facendo as súas prácticas na vila do Albariño. Coa súa chegada o corpo dispón nestes momentos de 14 axentes. Ademais, o obxectivo do concello é cubrir en breve unha nova praza que quedará vacante tras a xubilación doutro policía. Nestes momentos, o corpo conta con 14 axentes.

Recrear a Traslatio facendo dúas das tres etapas en kaiak polo río Ulla. É a proposta do Camiño que flúe – Camiño Azul Xacobeo 2026, unha iniciativa impulsada pola empresa Piragüilla. Medio cento de persoas arrancarán mañá esta actividade. Sairán dende Vilanova ata Bamio, en Vilagarcía. O sábado 17 continuarán en kaiak ata Pontecesures para o domingo 18 facer o percorrido a pé ata Santiago de Compostela. Unha proposta diferente para seguir promocionando o Camiño de Santiago por mar.

Nace ‘Adestrar sen pantallas’. Trátase dunha nova experiencia da Fundación Galega contra o Narcotráfico que busca promover o uso saudable da tecnoloxía entre a mocidade. O obxectivo é previr posibles adicións vinculadas á internet, aos móbiles, ás redes sociais ou ás apostas. O programa vaise desenvolver en tres localidades da nosa contorna: Vilagarcía, Cambados e Ribeira. En cada municipio, a fundación conta coa complicidade de clubes deportivos e dos seus adestradores, encargados de promover dende o deporte un uso máis responsable das novas tecnoloxías.