SALNÉS

Iníciase a licitación das obras do novo centro de saúde de Vilagarcía de Arousa. Hoxe a conselleira de planificación de infraestruturas e o seu homólogo de Sanidade visitaron a parcela onde se vai construír o edificio. O novo equipamento suporá un investimento de 19 millóns de euros. A intención é que as obras comecen a finais deste 2024.

Fumata branca en Vilagarcía de Arousa. Despois do achegamento de posturas do pasado venres, PSOE e BNG asinaron hoxe o acordo que permitirá dar luz verde aos orzamentos municipais para este 2024. As contas ascenderán finalmente a 39 millóns de euros, contando cun préstamo que van pedir de ao redor de 4 millóns. Ademais, o PSOE cederá ao BNG o seu posto no Consello de Administración da Autoridade Portuaria. O orzamento irá a pleno o vindeiro mércores 24 de xullo.

Cambados xa conta os días para a súa semana grande. A septuaxésimo segunda edición da Festa do Albariño comezará o vindeiro 31 de xullo, garantindo cinco días de gran ambiente, ampla programación e dos mellores viños na vila cambadesa. Haberá stands das adegas no Paseo da Calzada, o Túnel do Viño no Salón Peña, os concertos na Praza de Fefiñáns e o Xantar de Confraternidade no Pazo Torrado, entre outras citas que non poden perder.

O BNG reuniu hoxe en Vilagarcía aos seus alcaldes e cargos municipais nos concellos da ría de Arousa e do Baixo Ulla afectados pola mina de Touro e a celulosa de ALTRI. No acto, a voceira nacional da formación acusou ao presidente da Xunta de Galicia de poñer en risco a actividade na ría apoiando estes dous proxectos, que cualificou de bombas ambientais. Ana Pontón criticou que se poñan os intereses de dous multinacionais por enriba, dixo, da xente do mar e do marisqueo.

A voceira do Partido Popular de Cambados, Sabela Fole, xa é a vicepresidenta da Mancomunidade do Salnés. Fíxoo o PP en solitario, cos votos en contra de PSOE, BNG e Esquerda Unida. Fole entrará así na comisión executiva, igualando as forzas dos socialistas e dos populares, tendo en conta que estes teñen do seu lado o voto de calidade do presidente David Castro.

Este domingo 14 de xullo o Auditorio de Ribadumia acollerá a terceira edición do Festival de Bandas de Música organizado pola agrupación músico-cultural do municipio. A banda da agrupación actuará de anfitrioa e recibirá na casa á banda da Escola de Música de Riaxo e á Banda de Música Xuvenil de Xinzo, de Ponteareas. As actuacións comezarán ás 6 da tarde.

Dous fuxitivos da zona das Rías Baixas, entre os dez prófugos máis buscados pola Policía Nacional. Un deles é Baltasar Vilar Durán. Coñecido como Saro, está condenado a 45 anos de cadea por delitos de tráfico de drogas. O outro é Segundo Cousido Vieites. De 42 anos e natural de Vigo, foi condenado a unha pena de 32 anos de cadea por abusar de menores de idade nun campamento organizado por un colexio de Cambados.

En Ribadumia, o calendario deportivo non ten parada. Do 19 ao 21 de xullo os ollos do automobilismo galego estarán postos neste municipio do Salnés. O concello acolle a terceira edición do Rallymix Ribadumia, que atraerá os mellores pilotos da especialidade e mesmo algún piloto español de talle internacional. Ademais este ano a cita chega con novidades: a estrea dun galardón especial para os copilotos, en memoria da copiloto boirense Bárbara Gómez.

As traballadoras do Servizo de Axuda no Fogar de Vilagarcía reclaman melloras na súa situación laboral. En concreto, denuncian que teñen que utilizar os seus vehículos persoais para desprazarse entre as vivendas dos usuarios que atenden. Algo que, aseguran, lles está a xerar un importante prexuízo económico xa que a contía coa que as compensa a concesionaria non é suficiente para cubrir o mantemento dos coches. Por iso reclaman ao concello que teña en conta esta demanda nos pregos do novo concurso.

A Baixada Internacional do Río Umia cumpre 30 anos de vida. A proba, unha das máis importantes da comarca, celebrarase esta fin de semana no concello de Ribadumia, organizada polo club Náutico O Muíño. Será o sábado 6 de xullo, e está previsto que participen nela máis de 350 deportistas.