Vilagarcía

Remataron os traballos da nova senda peonil entre as parroquias de Bamio e Carril, en Vilagarcía. Trátase de medio quilómetro no que tamén se creou un acceso ao cemiterio carrilexo a través dunha pasarela. A xunta investiu nesta obra 330.000 euros. Esta mañá visitaron a zona o alcalde e a conselleira de Infraestruturas. María Martínez Allegue avanzou que se lle vai dar continuidade a este novo itinerario ata o núcleo urbano de Carril.

Máis de 3.300 sinaturas demostran o apoio ás reclamacións das familias do colexio do Piñeiriño, en Vilagarcía. Demandan á Xunta de Galicia o desdobre dunha aula de infantil, a de cuarto. Explican que hai 19 alumnos, tres con necesidades especiais. Eles computarían o dobre polo que se superaría a ratio establecida de 20 pequenos por aula. Hoxe presentaron as sinaturas na delegación da Xunta en Pontevedra.

A Deputación de Pontevedra financiará integramente a renovación da rúa Bouza de Abaixo, en Vilaxoán. A actuación suporá un investimento de máis de 770.00 euros. A intención do concello é sacala a licitación en agosto. A obra, moi demandada pola veciñanza da zona, suporá a transformación total do vial, coa creación dunha plataforma única. Tamén se aproveitará para renovar as acometetidas do saneamento.

A Asociación Cultural O Castro ofrecerá actividades de acompañamento e animación cultural no Hospital do Salnés. Esta mañá, o presidente desta asociación con base en Vilanova e o xerente da área sanitaria asinaron un convenio. Este acordo vaise traducir en que voluntariado da asociación prestará o seu apoio ás persoas ingresadas que o precisen, en especial, grupo vulnerables como persoas maiores ou xente que viva soa.

Xa está en marcha o novo plan de mobilidade da Illa de Arousa. Un total de 45 rúas dunha parte do centro urbano pasan a ser zona residencial. O tráfico quedou restrinxido a residentes, aínda que servizos e visitantes tamén poderán acceder en determinados casos. O concello insiste que o paquete de medidas servirá para evitar o colapso circulatorio que dende hai anos sufría esta zona. Comerciantes e hostaleiros cargan contra as medidas e pídenlle ao goberno local que recapacite.

O goberno de Vilagarcía levará ao pleno deste mes o convenio con Augas de Galicia para a ampliación da depuradora. O proxecto terá un custo de 31 millóns de euros, dos que o concello terá que aportar 6. Dado o elevado desa contía, o goberno local chegou a un acordo coa Xunta para financiar con fondos propios a súa parte, achegando 600.000 euros ao ano durante 10 anos. O alcalde agarda que esta proposta sexa aprobada por unha ampla maioría da corporación.

Concentración ás portas do Hospital do Salnés para denunciar o incremento das listas de agarda. O acto foi convocado por SOS Sanidade Pública, que denuncia que a Xunta está desmantelando o sistema sanitario para favorecer a empresas privadas, ás que deriva doentes. Aseguran que só na zona do Salnés hai 10.000 persoas en lista de espera. A concentración serviu tamén para reivindicar que durante o verán a ambulancia medicalizada que ten base no hospital non marche para Sanxenxo, para onde piden unha segunda unidade.

Preto dunha ducia de centros educativos daranxse cita en Salnés Ciencia. A segunda edición desta feira vaise celebrar este domingo na praza da Peixería de Vilagarcía. Alí a rapazada poderá amosar os seus experimentos e proxectos. Cada centro contará cun espazo propio para poder presentar as súas iniciativas. Este ano o instituto anfitrión é o Cotarelo Valledor de Vilaxoán.

A ría de Arousa conta con dous puntos clave para a observación e análise do medio mariño. Falamos da plataforma de Cortagada, do Observatorio Costeiro de Galicia, e da iniciativa REDEMAR, que conta con medidores nunha zona intermareal. A información que se recolle nelas permite facer predicións, ofrecendo respostas para o sector pesqueiro ou marisqueiro, pero tamén para facerlle fronte a posibles episodios de contaminación mariña.

Nace a campaña 'Vilagarcía 100%'. Trátase dunha iniciativa turistica que pon en marcha o concello de vilagarcía exclusiva para os vilagarciáns. Vanse ofertar 1.300 prazas para dar a coñecer a riqueza natural e histórica da vila de xuño a novembro. Haberá visitas a Cortegada, obradoiros, rutas e xincanas. Todas as actividades serán gratuítas.