Vilagarcía

O Intecmar traballa na súa transformación en axencia pública autonómica. O Instituto Tecnolóxico para o Control do Medio Mariño de Galicia, con base en Vilaxoán, calcula que o cambio administrativo podería estar completado a finais deste ano. Esta mañá visitou ese centro o conselleiro do Mar, logo de acompañar aos técnicos a unha recollida de mostraxes na ría de Arousa.

Zona Aberta pon en marcha a súa campaña de San Valentín. O colectivo de comerciantes e hostaleiros de Vilgarcía sorteará polo Día dos Namorados unha cea para dúas persoas. Ademais, en colaboración co Concello de Vilagarcía, vaise instalar un photocall cun gran corazón para que a xente poida sacar fotos.

Máis de 10.000 veciños de Vilagarcía veranse afectados polo freo ao coñecido como Decreto Ómnibus do Goberno do Estado. Son as contas que fai o Partido Socialista vilagarcián. Hoxe criticaron a postura de Partido Popular, VOX e Junts per Catalunya, que cos seus votos en contra impediron que saíran adiante as medidas en materia social que incluía. Son, por exemplo, a suba das pensións, a rebaixa do prezo do transporte público ou o bono social eléctrico. Os socialistas vilagarciáns piden aos deputados galegos do PP que interveñan para mudar a postura da súa formación.

A Mancomunidade do Salnés amosou en Fitur outra forma de facer o camiño. O organismo comarcal quere adiantarse ás necesidades dos visitantes, buscando cativar aos peregrinos de alto poder adquisitivo que optan por paradores ou hoteis para descansar no canto de albergues. Un perfil de visitante que busca experiencias novas, vinculadas a un turismo de calidade.

Aproveitando a celebración de Fitur, representantes da Mancomunidade e todos os alcaldes do xeodestino do Salnés asistiron a un encontro con empresariado da China en España. O organismo comarcal leva tempo traballando para fortalecer os lazos de cooperación coas principais organizacións empresariais do xigante asiático. En xogo, ademais de alianzas turísticas, novas relacións económicas en sectores comerciais estratéxicos, como o vitivinícola ou o da conserva.

A Mancomunidade presenta en Madrid Salnés Slow Business. Trátase dunha nova proposta turística que ofrece a oportunidade de combinar traballo e lecer. Máis de 80 negocios e empresas forman parte xa desta iniciativa dirixida a empresarios, altos executivos ou nómadas dixitais que precisan un descanso pero non poden desatender as súas responsabilidades laborais.

O marisqueo cae en picado na ría de Arousa. A Plataforma pola Defensa da Ría de Arousa puxo hoxe cifras sobre a mesa que amosan ás claras o importante descenso da produtividade nos últimos anos. Caen a maioría dos moluscos bivalvos, destacando a ameixa fina e o berberecho. Unha baixada que se traduce nun grave impacto económico. Dende o ano 2021, as perdas do marisqueo na ría de Arousa roldan os 47 millóns de euros. Por iso o sector reclama á Xunta que actúe con urxencia.

Vilagarcía diralle adeus en breve á Rúa Conde Vallellano, Xeneral Yagüe e Almirante Fontán. O Concello quere cumprir dunha vez por todas a Lei de Memoria Democrática e eliminar do rueiro municipal os vestixios da ditadura franquista. Esta mañá, celebrouse un encontro entre os voceiros das distintas formacións políticas para avanzar no cambio de nomes buscando o maior consenso posible e dándolle máis protagonismo ás mulleres. Dende Iniciativa pola Memoria din que aínda quedan outras mostras de apoloxía do franquismo na cidade que hai que eliminar e cren que o cambio de nome destas rúas chega tarde.

Familias de rapaces con autismo denuncian a súa preocupación polo futuro incerto que se lles aveciña ao rematar a súa etapa escolar. Son ata dez rapaces da contorna do Salnés e Pontevedra que nestes momentos non teñen garantida praza nun centro de día para adultos en Vilagarcía, porque o de BATA está xa ao límite da súa capacidade. A Xunta polo de agora ofrécelles como solución que os mozos, todos eles de entre 18 e 21 anos, acudan a diario a un centro de Nigrán. Unha proposta que as familias rexeitan.

Aínda que cada vez pasan máis desapercibidas, estamos de rebaixas. No comercio local din que polo de agora as vendas van lentas. En colectivos como Zona Aberta de Vilagarcía cren que esta campaña de descontos arranca demasiado cedo, poñendo a prezos de saldo os produtos de tempada, cando aínda queda moito inverno por diante. Con todo, agardan unha boa campaña, á vista do bo sabor de boca que deixa o período de Nadal nos establecementos asociados.