Vilagarcía

Vilaxoán prepárase para unha nova edición do Revenidas. O festival vaise celebrar entre os días 10 e 13 deste mes. Traerá ata a localidade vilagarciá grupos como De Ninghures, Dakidarría, Fillas de Cassandra, 9Louro ou The Rapants. Con todo, a gran novidade deste ano é o escenario 'Ondas e partículas', unha iniciativa na que colabora a Universidade de Santiago. Neste espazo ofreceranse charlas e talleres divulgativos entre concertos durante as catro xornadas do festival.

A pasada fin de semana decenas de confrarías enogastronómicas desfilaron polas rúas de Vilagarcía. Un evento cheo de cor e música que só podía significar unha cousa: o capítulo da Confraría dos Viños Rías Baixas volvía celebrarase na vila na súa vixésima edición. Unha cita que comezou co tradicional desfile dende a Casa Consistorial ao Salón García.

Tampouco haberá cambios nos plans da Xunta de Galicia para o colexio da Lomba, en Vilagarcía. Esta mañá representantes das ANPAS deste centro e do Anexo mantiveron unha reunión en Pontevedra co xefe territorial de Educación. César Pérez Ares confirmoulles a supresión dunha das tres liñas de 4º de Infantil. En concreto, será unha das dúas coas que ata o de agora contaba o colexio da Lomba. Tamén perderán unha praza docente e outra de docente de apoio de audición e linguaxe. As familias lamentan a falta de vontade negociadora e anuncian que seguirán coas mobilizacións.

O BNG traslada o seu apoio á comunidade educativa do colexio A Lomba de Vilagarcía polo peche dunha das aulas de cuarto de infantil. Os nacionalistas levarán ao Parlamento de Galicia e ao pleno do concello este asunto, demandando á Consellería de Educación que manteña esa aula e á profesora desa etapa. Critican que coa medida as ratios das outras dúas aulas dese curso van pasar ao máximo cando, apuntan, debera ser todo o contrario.

A ANPA do colexio A Lomba, en Vilagarcía, disposta a dar guerra trala decisión da Consellería de Educación de eliminar unha das tres liñas previstas para cuarto de infantil. Tamén dunha praza de profesora desta etapa educativa. As nais e pais denuncian que se trata dun engano, xa que a medida tómase despois de pechar o prazo de matriculación. Tamén insisten en que eliminar unha das aulas suporía un importante golpe á calidade do ensino. Hoxe mantiveron un encontro coa dirección do centro. Ademais, están a buscar o apoio da corporación vilagarciá ás súas demandas.

Vilagarcía estrea nova área de lecer. Xa está aberta ao público a nova zona verde da zona do Ramal. Un proxecto que busca reconectar a zona marítima coa cidade a través de zonas axardinadas e de sombra e unha pradeira cunha pequena lagoa. O concello destinou a este proxecto máis de un millón de euros de fondos Next Generation.

O evento celebrarase nas Neves, pero a Denominación de Orixe apostou este ano por traer a súa esencia ata O Carril. Alí presentouse este luns a programación da que será xa a vixésima edición, que se vai celebrar do 4 ao 12 de xullo. O tinto representa na DO unha parte moi pequena da produción, arredor do 0,5% da uva. Con todo, a festa supón un importante reclamo para a subzona do Condado do Tea, con catas ou conferencia arredor dos viños, pero tamén con outras propostas paralelas, como unha andaina ou actuacións musicais.

Xornada de mobilizacións dos traballadores de Correos na porvincia de Pontevedra. Convocados por CCOO, demandan máis persoal para as oficinas de atención ao público. Unha situación, din, que se repite en toda España. Na nosa contorna falan de puntos críticos como a oficina de Vilagarcía, onde debería haber seis traballadores pero só hai tres. Falan dun tempo de espera mínimo para os usuarios de media hora, así como retrasos no reparto de paquetería e correspondencia. Avanzan que logo do verán se mobilizarán por toda a provincia esixindo solucións.

Os Xoves abertos encherán de música Vilagarcía. O colectivo de comerciantes e hostaleiros Zona Aberta impulsa este ciclo de actuacións en varios puntos da cidade. O obxectivo é dinamizar as rúas do municipio con actuacións ao solpor. Ademais, en cada un dos cinco xoves que vai durar o programa haberá un sorteo dun pack de experiencias entre todos os tickets de compra.