Vilagarcía

Falece un repartidor de comida a domicilio nun accidente de tráfico en Vilagarcía. A moto na que circulaba bateu contra un taxi na recta de Rubiáns. A vítima tiña 37 anos. Ademais hai outra persoa ferida, un dos ocupantes do taxi, con prognóstico reservado. Este é o segundo accidente de tráfico mortal en Vilagarcía no que levamos de ano, logo do rexistrado o pasado venres nos Martices.

A Unión de Profesionais e Traballadores Autónomos reclama a creación dunha mesa pola industrialización e o emprego na comarca do Salnés. Cren que debería ser a Mancomunidade a que liderase esta iniciativa para que se asenten novas empresas na comarca. Ao mesmo tempo tamén se queren reunir coa Autoridade Portuaria de Vilagarcía para que o porto da cidade sexa moito máis que un punto de descarga de colectores.

Vilagarcía segue traballando na recuperación dos seus espazos públicos. Esta mañá o alcalde achegouse ata o parque das Gaivotas, onde se está a levar a cabo unha actuación integral de posta a punto. Ademais da renovación da zona de xogos infantil, estanse a reformar os bancos e instalar novo mobiliario. Nesta posta ao día desta zona, o concello investiu uns 40.000 euros.

Multitudinaria celebración en Vilagarcía para recibir o 2025. Milleiros de persoas déronse cita este mediodía na praza de Ravella para dar a benvida ao novo ano na XXIV Toma das Uvas. Os televisivos Mozos de Arousa actuaron este ano como mestres de cerimonia nestas badaladas adiantadas.

Vilagarcía rende homenaxe ás vítimas do franquismo cun monumento. Foi inaugurado esta mañá no cemiterio de Rubiáns, preto do lugar onde debería estar a fosa común que, segundo as investigacións, albergaba 17 corpos. Familiares das vítimas, colectivos para a recuperación da memoria democrática e autoridades descubriron o memorial reivindicando a dignidade das persoas asasinadas tras o Golpe do 36 e pedindo non esquecer a historia para non volver a caer nos mesmos erros do pasado.

Coñecer de xeito inmediato a calidade das augas das nosas rías e controlar os produtos do mar. Son dous dos obxectivos do Intecmar, o Instituto Tecnolóxico para o control do medio mariño de Galicia. Ata as súas instalacións en Vilaxoán chegan a diario ducias de mostras de todo tipo, de auga ou de recursos marisqueiros, para seren analizados. Para iso o Intecmar conta cunha ampla rede de captación de mostraxes, a través de barcos ou coa colaboración das diferentes confrarías de pescadores.

O goberno central garantirá a seguridade dos bateeiros durante a extracción da mexilla. Esta mañá asinouse en Vilagarcía unha instrución de servizo que vai regular esta actividade que, ata o de agora, se estaba a levar a cabo en precario por falta dunha norma axeitada. A nova regulación permitirá aos bateeiros regularizar as súas embarcacións para navegar fóra das augas abrigadas. Deste xeito ponse fin a unha vella reivindicación do sector.

O PP de Vilagarcía pide o cese da Concelleira de Urbanismo pola súa xestión dos fondos Edusi. Dende o PP acusan a Paola María de mentir. Indican que logo de preguntarlle ao goberno central pola xestión destes fondos, comprobaron que Vilagarcía só xestionou 3,4 millóns dos máis de 6 que tiña aprobados; e non 4,1, como afirmou a concelleira no pleno de setembro.

Un dos tríos máis queridos da actualidade despediuse onte do seu paso pola televisión. Despois de 400 programas, os Mozos de Arousa abandonaron onte o programa Reacción en cadena. Raúl Santamaría, Borjamina e Bruno Vila caeron ante ‘Los Alhambraos’. Marchan, iso si, despois de gañar 2,6 millóns de euros de premio e convertidos en profetas na súa terra. O concello de Vilagarcía xa anunciou que darán as badaladas de fin de ano no municipio, na tradicional convocatoria das 12 do mediodía.

Vilagarcía apoia por unanimidade as demandas da comunidade educativa do colexio de Vilaxoán. No pleno de onte, a corporación comprometeuse a reclamar á Xunta a incorporación dun experto en Pedagoxía Terapéutica e un coidador. Persoal que consideran necesario para que o alumnado reciba a atención que precisa, tendo en conta que o centro conta cun 31% de nenos con necesidades especiais.