Vilagarcía

Un verán máis a ambulancia medicalizada con base no hospital do Salnés trasladarase a Sanxenxo. O BNG volve cargar contra esta medida que, consideran, pon en risco a saúde da veciñanza de boa parte da comarca. Advirten que con este cambio de localización, os tempos de resposta multiplícanse, afectando en especial a municipios como Vilagarcía, Catoira, Cambados ou A Illa. Piden que o hospital manteña a ambulancia e que se dote a Sanxenxo e O Grove dunha segunda unidade medicalizada.

Ocorreu nunha vivenda de Corbillón contra as 6 e media da mañá deste martes. Sucedeu no marco dun operativo antidroga levado a cabo dende primeira hora en varios puntos do Salnés. Leváronse a cabo unha vintena de rexistros en Vilanova, Cambados, Ribadumia e Vilagarcía, que deixarían unha ducia de detidos. Esta operación continúa en marcha ao tempo que se abriu unha investigación para aclarar as causas do tiroteo mortal de Cambados. A familia nega que o varón tiverse relación co narcotráfico e asegura que estaba desarmado.

A ANPA do Centro de Educación Especial de Vilagarcía entrega máis de 9.000 sinaturas reclamando un centro de día e unha residencia. Inician deste xeito o camiño para chegar ata a Consellería de Política Social para lograr ese obxectivo. As familias explican que O Salnés necesita estes servizos, pensando nos agora nenos que no futuro serán adultos. Explican que precisan dun lugar onde poder seguir desenvolvendo a súa vida.

Xornada de mobilizacións en defensa da sanidade, alertando do incremento das listas de agarda. Na nosa contorna houbo protestas ás portas do Hospital Provincial, en Pontevedra, e no Hospital do Salnés. Advirten das demoras na atención primara e nas consultas especializadas e as consecuencias que isto está a ter no servizos de urxencias. Reclámanlle á Xunta un incremento do investimento na atención primaria ata acadar o 25% do orzamento do Sergas.

Zona Aberta de Vilagarcía lanza a segunda edición da súa ruta de tapas e compras. A iniciativa, que busca promocionar a hostalería e comercio local, arranca este xoves. Na cita participan de novo 11 establecementos, que ofrecerán as súas tapas a un prezo único de 4 euros. Ademais, este ano Martín Códax súmase á proposta, coa opción de gozar do petisco e unha copa de viño por 6 euros. O colectivo pon en xogo ademais 300 euros en vales de compra.

En Vilagarcía, a veciñanza da rúa Canto, en Faxilde, denuncia o estado que presenta o camiño. A vía sufriu varios afundimentos en distintos puntos, por mor do paso de vehículos pesados. Nun deses puntos, o concello instalou hai tres semanas unha prancha de ferro para tapar unha gran fochanca. Unha solución temporal que está a causar moitas molestias aos veciños, en especial pola noite, polo ruído que fai cando pasan coches. Aseguran que levan presentados xa varios escritos no concello denunciando o estado do camiño sen que ninguén lles faga caso.

A Plataforma en Defensa da Sanidade Pública convoca unha concentración para este xoves ás Portas do Hospital do Salnés. Desta volta, poñen o foco nas listas de agarda demandando á Xunta solucións. A protesta celebrarase de xeito simultáneo en distintos puntos de Galicia.

Convenio entre Zona Aberta de Vilagarcía e Vitaldent. A través deste acordo os asociados ao colectivo de comerciantes e hostaleiros da cidade terán vantaxes á hora de coidar a súa saúde dental. A clínica ademais súmase á entidade como novo socio.

Esquerda Unida votará a favor dos orzamentos de Vilagarcía. A formación apunta que son unhas contas que non lle acaban de convencer, pero que van apoialas porque reservan unha partida para a compra da casa dos duques de Terranova, onde propoñen construír unha residencia de maiores. Juan Fajardo fala duns 'malos orzamentos', pero di estar disposto a facer o que haxa que facer para que ese proxecto sexa unha realidade, mesmo incluso aínda que lle custe a súa representación no pleno.

A voceira nacional do Bloque mantivo este xoves unha reunión co patrón maior da Confraría de Carril. Logo de escoitar o sector, Ana Pontón demanda un plan de rexeneración para as rías. Tamén defendeu a bonificación das cotas da Seguridade Social aos mariscadores e a posta en marcha de hatcheries públicas e mixtas para garantir semente.