Vilagarcía

O Salón Vintec terá lugar no mes de outubro en Fexdega, coa previsión de reunir máis de 300 expositores de España, Portugal, Italia e Francia. O evento complétase con charlas, xornadas técnicas e unha zona de catas.

A Deputación de Pontevedra cifra en máis de 87 millóns de euros o seu investimento en servizos e infraestruturas do Salnés e Caldas. Dende o goberno provincial salientan o apoio a Vilagarcía, o municipio máis beneficiado dos 16 destas dúas comarcas. Para a capital do Salnés destináronse no que vai de mandato 9 millóns de euros. O presidente provincial destaca tamén o investimento de 14 millóns de euros na rede viaria provincial nestas dúas comarcas.

A Mancomunidade do Salnés ten preparado xa o proxecto para a reforma do que será o futuro Centro Loxístico Multiservizos. Trátase dunha infraestrutura estratéxica para a comarca que aglutinará distintos servizos mancomunados, como o parque de maquinaria ou espazos formativos. A transformación desta nave, situada no polígono de Sete Pías, está orzamentada en 600.000 euros. O organismo comarcal acaba de conseguir unha axuda da Xunta pola metade dese importe.

As confrarías da ría de Arousa piden a declaración de zona catastrófica ante a elevada mortaldade que está a sufrir o marisco. Os pósitos alertan da situación extrema na que se atopa o sector. Mesmo que esta crise mesmo pode levar ao peche de algunhas das confrarías da ría, á perda dos permex ou ao abandono da actividade marisqueira. Piden medidas estruturais, como a regulación do baleirado dos encoros ou un plan para a rexeneración. Ademais, demandan axudas directas a confrarías e a mariscadores. Tenden a man á administración central e galega na procura de solucións que salven o sector.

O BNG levou xa ao Parlamento Galego as súas propostas para paliar a crise da mortaldade do marisco na ría de Arousa. Ademais de axudas inmediatas para o sector, os nacionalistas piden medidas estruturais. Entre elas, estudos que determinen as causas da perda da produtividade, como o cambio climático ou a contaminación; e unha norma que regule o baleirado dos encoros. Este luns, os nacionalistas mantiveron unha xuntanza con representantes da confraría de Carril.

Vilagarcía anima á veciñanza a alimentar un comelixo. O concello pon en marcha unha nova campaña para fomentar a separación de residuos. Salientan que na cidade cada vez se recicla máis e mellor, pero que cómpre seguir dando pasos. Destacan a importancia de separar o lixo para evitar que os custes suban, porque -lembran- as novas normas penalizan todo o lixo que chega mesturado a Sogama.

Unha muller tivo que ser evacuada ao Hospital do Salnés logo de declararse un lume na súa vivenda. A vítima foi rescatada nun balcón polos efectivos de emerxencia. Tamén foi evacuada outra persoa doutro dos pisos do inmoble. Todo apunta que o incendio se declarou nun cadro eléctrico, provocando unha gran cantidade de fume.

Avanzan a bo ritmo as obras do novo centro de saúde de Vilagarcía. Esta mañá recibiron a visita do conselleiro de Sanidade, a súa homóloga de Infraestruturas, o alcalde da vila e varios concelleiros da corporación. Os traballos xa están a pleno rendemento, despois de que a sucesión de temporais afectara á súa planificación. Así as cousas, está previsto que a infraestrutura entre en funcionamento o vindeiro ano.

A Deputación destaca a súa aposta en investimentos en Vilagarcía con dous proxectos que obtiveron 120.000 € de recursos provinciais. Trátase da ampliación da rede de abastecemento e saneamento en Muíños de Cea, financida con fondos do +Provincia, e a instalación dunha nova pista desmontable en Fexdega, cunha achega do Plan Extraordinario de Infraestruturas Deportivas. Este xoves visitou esas dúas actuacións o deputado Javier Tourís xunto con membros do goberno local.

Pois seguimos falando do futuro da ría de Arousa. A Plataforma en Defensa da Ría advirte que as perdas económicas do marisqueo nos últimos cinco anos acadan os 59 millóns de euros, sen ter en conta o IPC. Xunto con confrarías e agrupacións de mariscadoras e mexilloeiros, o colectivo lamenta a falta de políticas de saneamento e rexeneración por parte da Xunta. Cargan contra o goberno galego pola súa inacción e por impulsar 'proxectos nocivos' para a ría.