PONTEVEDRA

Os bombeiros de Pontevedra regresaron hoxe ao pleno municipal. Dende o salón da Casa Consistorial, os seus representantes volveron reclamar ao goberno local un incremento do cadro de persoal para evitar que as quendas queden por debaixo dos mínimos e non ter que facer horas extra de xeito obrigatorio. Foi o PP quen interpelou ao executivo local sobre as medidas a tomar para garantir a seguridade e a saúde dos bombeiros. Un dos momentos máis tensos da sesión plenaria.

O presidente da Deputación de Pontevedra aconsella ao alcalde de Vilagarcía que asuma os seus fallos. É a resposta de Luis López á polémica aberta despois de que a institución provincial denegara á capital arousá unha achega no marco do Plan Extra. Alberto Varela considera que a decisión responde a interese electoral e anunciou que recorrerá ao Contencioso. López negou estas acusacións e defendeu o traballo dos técnicos da Deputación.

Din que é unha mestura entre bádminton, pádel e pimpón. É o pickleball, un deporte que cada vez gaña máis forza en distintos concellos das Rías Baixas, como por exemplo, en Poio. En Raxó, este vindeiro sábado, van acoller un campionato internacional no que nove clubs de distintos puntos de Galicia e Portugal medirán as súas forzas. A xornada, na que participará case un cento de deportistas forma parte da denominada Liga Atlántica de Pickleball.

Dende marzo ata outubro a Deputación de Pontevedra desenvolverá a segunda entrega de Mulleres de Palabras. Unha programación que este ano contempla sete citas para conversar en distintos puntos da provincia sobre o peso das mulleres nas letras e na arte.

O BNG reclama á Xunta de Galicia que tome medidas para adiantarse ao impacto que a guerra en Oriente Medio pode ter na cidadanía galega. Dende Pontevedra, a voceira Ana Pontón esixiu a posta en marcha dun plan extraordinario de apoio económico e social, con iniciativas dirixidas tanto aos sectores produtivos como aos fogares. Axudas directas, un bono transporte, eliminar as peaxes ou liñas de crédito específicas son algunhas das propostas.

O Mareantes Rugby Club volve traer a Pontevedra o San Patricio. Dende a carpa instalada na praza do concello, a entidade aproveita o festivo do día 19 para desenvolver unha programación moi ambiciosa. A festa comezará o mércores 18 e prolongarase ata o domingo. Uns días nos que non faltarán a música, a maxia, a comida e, por suposto, a cervexa.

Na área sanitaria de Pontevedra e O Salnés os doentes teñen que agardar 66 días de media para unha operación cirúrxica. É un dos datos que hoxe presentaron dende a xerencia sobre o balance da actividade asistencial. Durante o 2025, os casos graves chegaron a atenderse en menos de 20 días. Para as consultas con especialistas, a espera media foi de case 68 días. Todo, din, nun exercicio marcado polo impacto das folgas médicas.

A Praza de España en Pontevedra acollerá este sábado 14 de marzo unha concentración contra a guerra en Oriente Medio. A convocatoria ten detrás á plataforma PararLaGuerra, que chama á cidadanía a mobilizarse para reclamar que cesen as hostilidades. Ademais, manteñen o foco na situación que se vive en Gaza, alertando da crise humanitaria que se vive no territorio. A concentración, que se replicará noutras cidades de España, será ás 12 do mediodía.

En Pontevedra, a Xunqueira da Gándara e a Illa do Covo estrean nova iluminación. A intervención aposta pola tecnoloxía LED que, ademais de conseguir aforro enerxético, mellora o respecto á fauna da contorna. Esta mellora está incluída nun contra máis amplo por un importe de case 200.000 euros.

Unións Agrarias oponse a que na Denominación de Orixe Rías Baixas se reduza o rendemento por hectárea aos viticultores. O sindicato rexeita a proposta que plantexa baixar dos 12.000 aos 10.000 os quilos por hectárea. Cren que a proposta se debe a problemas na xestión do stock dun número reducido de adegas e que só vai prexudicar aos viticultores. A intención de Unións Agrarias é evitar que a medida se leve a pleno e adiantan que, de facerse, tomarán medidas.