PONTEVEDRA

Pontevedra actuará nos restos arqueolóxicos da praza Valentín García Escudero. O concello proxecta a posta en valor e consolidación dos arcos medievais da ponte do Burgo que se atopan neste espazo. O obxectivo é retirar os puntais actuais, mellorar a visibilidade dos restos e realizar novas escavacións arqueolóxicas no punto. O investimento ascende a 236.000 euros.

Boa sintonía entre a Xunta e o concello de Pontevedra. Alfonso Rueda e Miguel Anxo Fernández Lores asinaron un convenio por valor de 3 millóns de euros. Destinaranse á construción do novo pavillón de Monte Porreiro e a avanzar no saneamento. Ademais, houbo avances en temas pendentes, como a liberación da Xunqueira da Gándara ou a colaboración da Xunta no financiamento da Gran Final das Series Mundiais de Tríatlon que a cidade acolle este ano. Un exemplo de entendemento, dixo Rueda, entre dúas administracións de diferente cor política.

Neste 8 de marzo a Plataforma Loita quixo tamén alzar a voz coas súas reivindicacións. Reclaman atención post-temperá, ou o que é o mesmo: que a cativada que o precise poida seguir recibindo terapias na sanidade pública despois de cumprir os 6 anos. Destacan que os coidados seguen a recaer na súa maior parte nas mulleres, polo que moitas nais de pequenos neste tipo de situacións teñen que deixar de traballar para poder atendelos.

‘A nosa meta, a igualdade’ é o lema escollido pola Deputación de Pontevedra para este Día Internacional da Muller. Hoxe o acto central celebrouse no vestíbulo do Pazo Provincial. A encargada de ler o manifesto foi a directora deportiva do Traviesas Hockey Club, Marina Pérez. Puxo o foco na mocidade e no impacto limitante que están a ter as redes sociais nas aspiracións das nenas.

O Goberno do Estado non cederá á Xunta de Galicia a súa parcela do Parque de Maquinaria da Avenida de Uruguay, en Pontevedra, para construír vivenda pública. A semana pasada a Conselleira de Vivenda anunciara este proxecto, explicando que os executivos central e autonómico son copropietarios destes terreos. Pero mentres Martínez Allegue aseguraba que a Xunta é titular do 75%, hoxe o subdelegado do Goberno dixo que o é dun 37%. Por iso, Abel Losada cualificou o anuncio de ‘okupación’.

Facer fronte ao avance do discurso reaccionario. É o obxectivo que se marca o concello de Pontevedra coa súa nova campaña co gallo do 8M, Día Internacional da Muller. O lema non deixa lugar a dúbidas: ‘Non van conseguir que o medo nos volva encerrar nas casas’. Para elo, deseñaron unha ampla programación que se estenderá nos vindeiros meses, comezando cunha Primavera Feminista.

O concello de Pontevedra cifra en máis de 4 millóns de euros os estragos producidos polos temporais. As contas recompilan 41 incidencias rexistradas dende novembro do ano pasado a finais de xaneiro deste 2026. Os estragos no Recinto Feiral e no colector do río dos Gafos son os de contía máis elevada. Agora o concello presentouse á liña extraordinaria de axudas convocada polo Goberno Central para atender estes danos.

Tras 35 anos de traballo, a asociación Down Pontevedra Xuntos tense convertido en todo un referente no apoio ás persoas con discapacidade intelectual e as súas familias. Actualmente, dende as súas instalacións na rúa do Gorgullón, en Pontevedra, atenden a máis de 120 persoas. Nos últimos tempos desenvolven un programa pioneiro en Galicia para afrontar o envellecemento dos seus usuarios.

En Pontevedra, avanzan a bo ritmo as obras do futuro parque da Parda. Hoxe o alcalde visitou os traballos, que están a sufrir un pequeno retraso por mor dos temporais que se encadearon ao longo do inverno. Así as cousas, Miguel Anxo Fernández Lores asegurou que a intención é que esta nova zona verde, dotada de zona de xogos e aparcadoiros, estea rematada a principios do vindeiro ano.

Un goberno inmobilista pero con moita propaganda. É o resumo que fan dende o Partido Socialista dos dous anos de Alfonso Rueda á fronte da Xunta de Galicia. Para o PSOE, a xestión do presidente popular está marcada pola baixa execución e reclaman políticas públicas reais e planificación.