PONTEVEDRA

O Partido Socialista levará o problema da vivenda ao vindeiro pleno municipal de Pontevedra. A formación presentará unha moción con dúas propostas principais: dunha banda, a creación dunha bolsa municipal de vivendas en alugueiro; da outra, aplicación de incentivos fiscais para introducir pisos baleiros no mercado. Medidas de choque, dixo Iván Puentes, para atacar un problema que preocupa, e moito, a cidadanía.

Pontevedra aposta por coidar dos que coidan. E faino coa primeira edición do programa ConCoidado, unha proposta que nace da iniciativa de tres profesionais de Enfermaría Familiar e Comunitaria. Son catro sesións semanais que se desenvolverán durante o mes de novembro, pensadas para mellorar os coñecementos e a vida das persoas coidadoras e axudalas a tecer redes de apoio entre elas.

Vegalsa-Eroski busca traballadores para o novo supermercado que abrirá en novembro no polígono do Vao, en Pontevedra. Neste proceso, a empresa contou hoxe coa colaboración da Xunta de Galicia. A través do programa Xunta Conecta, a administración galega puxo en contacto o equipo de recursos humanos con persoas interesadas en cubrir ata 60 postos dispoñibles. Esta mañá as oficinas do Servizo Público de Emprego da cidade serviron de punto de encontro entre as dúas partes.

Máis avances nas obras de destape do río Gafos, en Pontevedra. Actualmente os traballos céntranse na renovación dos colectores e a retirada do formigón en Campolongo, coa demolición do canal. Unha tarefa complicada que, polo de momento, cumpre os prazos previstos. O proxecto mantén a previsión de remate no mes de xuño de 2027.

Hoxe, 6 de outubro, conmemórase o Día Mundial da Parálise Cerebral. En Pontevedra, a Casa da Luz acolleu un acto reivindicativo organizado por Amencer-ASPACE. Foi baixo o lema ‘Coidar sen renunciar’, poñendo o foco na importancia dos coidados e nos que os prestan, principalmente as familias.

Un novo informe encargado pola Xunta de Galicia ratifica que os áridos afectados pola futura dragaxe do Lérez son de categoría A. Isto quere dicir, segundo a conselleira do Mar, que son da máxima calidade e que poden depositarse en alta mar. Marta Villaverde explica que este documento atende ao último requirimento realizado polo MITECO e reclama ao Ministerio lealdade institucional e a máxima celeridade para que a dragaxe poida levarse a cabo o vindeiro 2027.

Pontevedra súmase ás mobilizacións que atravesan España polo dereito á vivenda. A cita está impulsada por un novo colectivo cidadán e celebrarse o vindeiro luns ás 8 da tarde na Praza da Peregrina. O obxectivo: reivindicar a vivenda como un dereito fundamental e non un negocio. A concentración pretende ser o primeiro paso dun movemento cidadán organizado na cidade.

O PSOE de Pontevedra reclama á Deputación que asuma a parte da Xunta de Galicia na renovación do terreo de xogo do estadio de Pasarón. Os socialistas acusan á administración autonómica de discriminar á cidade ao negarse a participar deste investimento, cando si o fixo no estadio da Malata, en Ferrol. A actuación está orzamentada en 1,7 millóns de euros, e o pleno pontevedrés aprobara financialo a tres bandas: concello, Deputación e Xunta.

Empeoran as listas de espera na área sanitaria de Pontevedra e O Salnés. A 30 de xuño, o tempo medio de agarda por unha cirurxía era de 90,7 días, un mes máis que no balance anterior. No caso das consultas con especialistas, a espera media está en 70 días. Dende a xerencia apuntan que son cifras que recordan aos niveis postpandemia e responsabilizan á folga de médicos contra o estatuto marco e ao absentismo nas citas.

A Fundación Xoán XXIII celebra o éxito dos primeiros meses da posta en funcionamento do seu proxecto Botánico do Lago. Dende abril a entidade mantén aberto un garden no Lago Castiñeiras atendido por persoas con discapacidade intelectual. Un proxecto con vertente social, educativa e ambiental con máis fases por diante.