PONTEVEDRA

O concello de Pontevedra conmemorou o Día Internacional pola Eliminación da Violencia contra a Muller ampliando a instalación artística que recorda ás vítimas. Hoxe instaláronse catro placas máis no conxunto situado no solo da rúa Rosalía de Castro, xusto diante da Audiencia Provincial de Pontevedra. Son pezas en memoria das catro vítimas que a violencia machista deixou na provincia neste 2025.

Poio xa ten preparada a programación para as festas do Nadal. Unha época na que o municipio terá uns visitantes moi especiais: os Elfos Máxicos percorrerán as distintas parroquias para sorprender á veciñanza e levar o espírito festivo a todos os recunchos. Repiten tamén as Aldeas de Nadal e a carpa de Poio Máxico, que completan unha ampla proposta para todos os públicos.

As nais e pais teñen un novo recurso á súa man para facer máis levadíos os ingresos dos seus bebés na área de Neonatoloxía do Hospital Provincial de Pontevedra. A área sanitaria e a Editorial Kalandraka veñen de poñer en marcha unha biblioteca de publicacións infantís. No marco da campaña ‘os libros tamén acunan’, as familias xa poden acceder a exemplares pensados para reforzar os vínculos e estimular aos seus bebés mentres están ingresados.

Unanimidade no pleno de Pontevedra no rexeitamento da A57. Os tres partidos da corporación aprobaron de xeito conxunto unha moción do Partido Popular, emendada por PSOE e BNG, para instar ao Goberno do Estado a que non siga adiante coas dúas fases que aínda quedan do proxecto. Consideran que se trata dunha infraestrutura demasiado lesiva para o territorio que atravesa, como levan anos denunciando os veciños afectados.

Despois de que a corporación pontevedresa aprobara por unanimidade o seu rexeitamento a continuar co proxecto da A57, os veciños das parroquias afectadas abandonaron a sesión satisfeitos por esta mostra de apoio. Iso si, apuntaron que non estarán totalmente tranquilos ata que dende o Ministerio de Transportes se confirme que non se continuará traballando nesta infraestrutura.

Os traballadores da fábrica de ENCE en Lourizán, en Pontevedra, non queren dar un paso atrás. Comisións Obreiras, sindicato maioritario no comité, acusa á dirección da empresa de romper os compromisos adquiridos e de enganar ao persoal, á comarca e mesmo á Xunta de Galicia. Recordemos que a pasteira puxo sobre a mesa a súa intención de prescindir de 39 postos de traballo. Dende Comisións Obreiras aseguran que non serán cómplices deste recorte e manteñen o calendario de folga.

Preocupación polo avance imparable da toxina en todas as Rías Baixas. Nestes momentos as rías de Pontevedra e Muros-Noia atópanse totalmente clausuradas, así como boa parte da de Arousa. En concreto, están pechados 41 dos 52 polígonos das rías.

Xa está aberto ao público o tradicional mercado da Asociación Española contra o Cancro de Pontevedra. Dende hoxe e ata despois de Reis, poderán realizar as súas compras solidarias no local deste ano, o número 14 da rúa García Camba, en pleno centro da cidade. O ano pasado grazas a esta iniciativa a asociación recadou preto de 25.000 euros, que destinaron a sufragar as súas actividades e á investigación do cancro.

O Partido Socialista de Pontevedra presenta varias emendas á moción que o Partido Popular levará ao vindeiro pleno sobre o proxecto da A57. A formación critica o texto dos populares e consideran que demostra a falta dun proxecto para a cidade de Pontevedra por parte do PP. O BNG, pola súa banda, estudará presentar as súas propias emendas.

A vida de Ramón García Martínez, veciño da parroquia pontevedresa de Campañó que sobreviviu ao campo de concentración de Mauthausen, debúllase en ‘Entre los muros del olvido’, o último libro do xornalista Juan de Sola. Apoiado en documentación histórica, o autor reconstrúe a vivencia deste home, representación clara da historia do século XX. No proceso, Sola contou con dúas aliadas de excepción: as fillas de Ramón García, Silvana e Mayte, que o axudan no rescate dunha vida que merece ser contada.