PONTEVEDRA

Arranca unha nova edición da Escola Feminista da Mocidade do Concello de Pontevedra e faino con diferentes propostas centradas no autocoidado. Son seis actividades dirixidas á rapazada de 15 a 35 anos, todas elas gratuítas. Comezarán agora en novembro e prolongaranse ata maio do 2026.

Pontevedra recupera o proxecto Pontevedra Rodando, unha iniciativa dirixida a introducir á cidadanía no audiovisual. Os participantes terán cinco sesións teórico-prácticas para achegarse ao mundo do cinema e da creación audiovisual. Será a quinta edición da iniciativa, que prestará especial atención aos Premios Feroz que se entregarán en Pontevedra en xaneiro do 2026.

O Instituto Sánchez Cantón de Pontevedra non faltou á súa tradicional cita co Samaín. O alumnado do módulo Tempo de Lecer encargouse un ano máis de dar forma ao seu particular Túnel do Terror. Unha proposta que desta volta estivo dedicada á cultura galega e ao seu imaxinario máis terrorífico.

A veciñanza da contorna das rúas Casimiro Gómez e Padre Fernando Olmedo, en Pontevedra, mira con preocupación a chegada do inverno e das fortes chuvias. Hoxe a Asociación de Afectados polas Inundacións do Río Valdecorvos mobilizouse para visibilizar o seu medo ante a posibilidade de que se repitan os asolagamentos de anos anteriores. Cren que unha vez máis chega a época máis complicada do ano con moitas preguntas e sen que as administracións fixeran os deberes.

O Pleno do Concello de Poio aprobou o inicio do procedemento para adxudicar o novo contrato da auga. O goberno local asegura que con el se mellora a calidade no servizo. Pola contra, a oposición, denuncia que este novo contrato tradúcese nun 'sablazo'. BNG e PSOE acusan ao goberno popular de mentir e ocultar á veciñanza a 'brutal suba' das tarifas da auga e o saneamento. Hoxe, os socialistas fixeron público un documento que lles faciliou o alcalde no Pleno onde, din, quedan claras esas subas abusivas.

A Deputación de Pontevedra xa ten listos os orzamentos para o vindeiro ano. Nas contas do 2026, a administración provincial contará con 238,6 millóns de euros, unha contía récord e que supoñen un 13,6% máis que no exercicio deste 2025. Estes orzamentos, que son os terceiros da Deputación con Luis López como presidente, entrarán en vigor o 1 de xaneiro de 2026 e, segundo López, son froito da estabilidade política.

Pontevedra acolleu este mediodía unha das concentracións convocadas en toda Galicia contra o acoso escolar. Unha mobilización que responde á vaga de actos en recordo de Sandra Peña, a nena que se suicidou en Sevilla tras sufrir acoso escolar. Ela foi recordada hoxe na convocatoria pontevedresa, á que asistiron un cento de estudantes, moitos deles acompañados polas súas nais e pais. Algúns recoñeceron que sufriron, ou están a sufrir, bullying nos seus centros escolares. Todos xuntos reclamaron máis concienciación e máis medios para detectar e frear estes casos.

O profesorado mobilizouse hoxe en Pontevedra. A cidade acolleu unha das catro manifestacións convocadas en toda Galicia no marco da segunda xornada de folga no ensino público. Accións coas que o colectivo reclama melloras laborais e máis recursos para a educación pública.

Este 25 de novembro, Día Internacional da Eliminación da Violencia contra a Muller, Pontevedra contará maltratadores en lugar de vítimas. Inspirado polo caso da francesa Giselle Pelicot, o concello decidiu na campaña deste 2025 mudar a vergoña de bando. Segundo os datos recollidos, entre o 2015 e o 2024 contabilizáronse en Galicia 12.976 homes condenados por sentenzas firmes por violencia machista.

O alcalde de Pontevedra esixe á Deputación que manteña a relación de respecto que, asegura Miguel Anxo Fernández Lores, sempre existiu entre as dúas administracións. Para o rexedor capitalino, o feito de que ata dez concellos da provincia recibiran no 2024 máis transferencias directas da Deputación que Pontevedra, é un ataque ao estatus da cidade. Nunha carta enviada ao presidente, Fernández Lores demanda a Luis López que remate con este trato que considera discriminatorio.