PONTEVEDRA

Tras coñecer o informe da CIAIM, as familias dos mariñeiros falecidos aseguran estar satisfeitas. Hoxe compareceu ante os medios de comunicación a súa voceira, María José de Pazo, filla dun dos tripulantes desaparecidos no naufraxio. Cren que o documento é rotundo, cunhas conclusións que amplían o espectro de responsabilidades. Continúan a reclamar xustiza para os seus mortos.

A campaña solidaria vaise celebrar na provincia de Pontevedra os días 7 e 8 de novembro co obxectivo de recoller 325.000 quilos de alimentos. Na súa presentación como padriño Solla fixo un chamamento á solidariedade, lembrando que o banco de alimentos aínda precisa máis de 500 voluntarios para a recollida. Fixo tamén un chamamento á responsabilidade, denunciando os millóns de toneladas de alimentos que acaban no lixo.

O futuro centro de acollida para mulleres en risco de exclusión social que habilitará Cáritas en Pontevedra encara a súa fase final nas obras. Bautizado como Santa Ana, busca ofrecer un aloxamento digno, acompañamento social e espazos terapéuticos a mulleres vulnerables na comarca. Un centro pioneiro na contorna. Para completar o proxecto, que supón un investimento de 450.000 euros, Cáritas vén de poñer en marcha unha campaña de micromecenado.

O modelo de cidade de Pontevedra continúa chamando a atención doutros concellos que están a traballar na recuperación do espazo público para as persoas. Hoxe visitou a capital pontevedresa unha delegación de Alzira, un municipio valenciano de algo máis de 49.000 habitantes.

A Fundación Xoán XXIII presentou hoxe o ambicioso proxecto no que está a traballar. Trátase de Botánico do Lago Castiñeiras, co que busca xerar emprego inclusivo, normalizar o traballo das persoas con discapacidade intelectual e revitalizar a contorna deste espazo natural. A entidade agarda que esta iniciativa, que contempla a posta en marcha de diferentes espazos como unha cafetería ou un viveiro, poida estar funcionando na primavera do vindeiro ano.

Amencer Aspace recoñece as dificultades que para a asociación supón que a Xunta non amplíe o número de prazas concertadas na residencia que xestionan en Pontevedra. Aínda que conta con 32 prazas para atender a persoas con parálise cerebral, dende a súa posta en funcionamento só 12 contan con concerto autonómico.

O gourmet galego prepárase para a súa cita ineludible en Pontevedra. Os días 8, 9 e 10 de novembro o Recinto Feiral acollerá unha nova edición, e xa van nove, de Etiqueta Negra. O salón xa está consolidado como o gran escaparate da innovación, a calidade e o talento dos produtores de toda Galicia. Este ano reunirá un cento de expositores e presentará vinte novidades.

Hoxe conmemórase o Día para a Erradicación da Pobreza e a asociación Boa Vida saíu á rúa en Pontevedra para poñer o foco sobre os malos tratos sociais e institucionais que padecen as persoas en risco de exclusión. Cunha mesa informativa na Praza da Peregrina, interpelaron á veciñanza para recoller as súas opinións e reflexións. Dende o advirten de que a pobreza non é só a escaseza de recursos, tamén non poder acceder a eles. E sinalan a dificultade de acceso á vivenda como un dos principais problemas en Pontevedra.

A Asociación Española contra o Cancro presentou hoxe en Pontevedra a súa nova campaña de concienciación sobre o cancro de mama. Baixo o lema ‘Nos lo tomamos a pecho’, a iniciativa pon o foco no que significa vivir con esta enfermidade máis aló do diagnóstico e do tratamento. E quen mellor para poñer voz a esta realidade que mulleres que a padecen. Elas cocrearon e protagonizan esta nova campaña.

As farmacias pontevedresas súmanse á loita activa contra a violencia machista. Hoxe comezou a posta en marcha do programa de intervención do farmacéutico en materia de violencia de xénero, unha iniciativa que supón a implantación do punto violeta entre as máis de 400 oficinas de farmacia que se queiran sumar. Unha medida que pode ser clave en moitos casos, sobre todo no rural.