PONTEVEDRA

O PSOE propón crear en Pontevedra un servizo público de aluguer de bicicletas eléctricas. A formación levará unha moción ao vindeiro pleno instando ao concello a solicitar as axudas do Ministerio de Transporte para esta iniciativa, coa que buscan impulsar a mobilidade sostible e accesible. A intención é que este servizo se integre no sistema de billete único do transporte metropolitano, facéndoo compatible co billete de tren e autobús.

Primeira protesta dos traballadores do hospital Quirónsalud Miguel Domínguez de Pontevedra contra os recortes. Hoxe concentráronse ás portas do centro para denunciar a decisión de pechar a Unidade de Coidados Intensivos e de despedir a oito membros do persoal doutros servizos. O calendario de mobilizacións continuará ata que os traballadores sexan recibidos polos responsables do Grupo QuirónSalud de Madrid.

O concello de Pontevedra prepara unha batería de proxectos para optar aos fondos europeos do Plan de Estratexia de Desenvolvemento Integrado Local, os EDIL. A intención do goberno é optar á contía máxima de subvención, que acada os 20 millóns de euros. Incluirá na súa proposta actuacións en tres barrios, dirixidas a transformalos aplicando os mesmos parámetros que no centro da cidade. Son proxectos para Monte Porreiro, para A Seca e Valdecorvos e para A Parda.

Montar unha fábrica de tabaco clandestina nunha nave de Cerponzóns, en Pontevedra. Eran os plans dun veciño de Poio. Proxecto que frustrou unha operación conxunta da Axencia Tributaria e a Policía Nacional. No marco das investigacións, bautizadas como Tempus Sisha, incautáronse tamén 142 quilos de tabaco de contrabando e o material necesario para a súa fabricación. O principal sospeitoso tiña antecedentes por contrabando de tabaco.

Vivir co Rural é un dos proxectos que ten en marcha a asociación Boa Vida, en Pontevedra. Dende a Horta Comunitaria que ten en Salcedo, o colectivo leva adiante unha experiencia de aprendizaxe para que os seus participantes coñezan como coidar a terra, xestionar de xeito sostible os recursos e traballar en equipo. Como todas as iniciativas de Boa Vida, esta está dirixida a persoas en situación de vulnerabilidade.

Rafael Louzán, absolto do delito de prevaricación administrativa. O Tribunal Supremo decidiu finalmente estimar o recurso presentado polo expresidente da Deputación de Pontevedra. Así, botou abaixo a sentenza condenatoria da Audiencia Provincial pontevedresa de 7 anos de inhabilitación para emprego ou cargo público pola concesión dunha subvención para as obras de mellora no campo de fútbol de Moraña. Esta decisión permitiralle seguir no seu carg

O Centro Integrado de Formación Profesional Carlos Oroza volve ao Gastroespazo do Mercado de Pontevedra. Por segundo ano consecutivo, a escola contará cun espazo semanal para que o alumnado poña en práctica o aprendido. Neste caso participan cinco proxecto diferentes, que levarán as súas propostas a un escenario real con público. Unha colaboración única no Estado.

A Policía Local de Poio está en pé de guerra contra o goberno local. Denuncian que levan dende o mes de maio sen cobrar as horas extra e cren que se trata dunha medida de presión do alcalde, Ángel Moldes, despois de que se negaran a cubrir eventos nocturnos pola falta de axentes. Aseguran que polo tamaño do concello o cadro de persoal do corpo debería contar con 23 policías pero que a día de hoxe só son 7. Acusan ao goberno local de acoso e discriminación e non desbotan recorrer aos tribunais.

A Área Sanitaria de Pontevedra e O Salnés xestionou no 2024 a doazón de nove órganos e dúas córneas. Todos procedentes de tres doadores, dun total de cinco potenciais. Destacan dende a xerencia que tan só se deu unha negativa familiar. Ademais, o Hospital Montecelo ten en marcha un novo protocolo de doazón tras unha morte circulatoria, coñecida como doazón en asistolia controlada, que cren que incrementará o número de doadores. Esta mesma tarde, realizouse a primeira destas doazóns.

O 2024 foi 'inmellorable' para o turismo en Rías Baixas. O ano pasado visitaron a provincia de Pontevedra 1,8 millóns de persoas. É un 5% máis respecto ao 2023. Segundo o presidente provincial, Luis López, trátase do mellor ano turístico da historia.